Sý tasqynyna tolyq ázirlik týraly aıtýǵa áli erte - ІІM basshysy

NUR-SULTAN. QazAqparat – Іshki ister mınıstri Erlan Turǵymbaev sý tasý qaýpi bar eldimekenderden halyqty qaýipsiz jerge kóshirý boıynsha josparly jumystyń oryndalmaı jatqanyn málim etti, dep habarlaıdy QazAqparat tilshisi.

«Jalpy, ázirge sý tasqynyna tolyq ázirlik týraly aıtýǵa áli erte. Sý qorǵaý aımaqtary sheginde ornalasqan úılerdiń turǵyndaryn qaýipsiz ýchaskelerge kóshirý boıynsha josparlanǵan is-sharalar oryndalmaı jatyr. Qazir osy jumys tek Soltústik Qazaqstan, Aqmola oblystarynda júrgizilýde. Aqtóbe oblysynda endi bastaldy. Mundaı jerlerde 170 700 qurylys nysany men turǵyn úı ornalasqan», - dedi Erlan Turǵymbaev Úkimet otyrysynda.

Mınıstrdiń aıtýynsha, qurylys nysandary men turǵyn úılerdiń kóbi Almaty qalasynda (81 148), ShQO (47 823), BQO (21 008), Aqmola (5 693), Qyzylorda (4 929) oblystarynda ornalasqan.

«Bul óte shyǵyny kóp is-shara ekeni sózsiz, alaıda jumys istelmese, saldary budan da aýqymdy bolýy múmkin. Sondaı-aq, 2019 jyly josparlanǵan 91 is-sharanyń 36-sy iske asyrylmaı qaldy. Onyń ishinde jaǵany bekitý (3), sý ótkizgish qubyrlardy salý (3), sý qoımasyn jóndeý (1), jobalaý-smetalyq qujattamany ázirleý (28) jumystary bar. Osynyń saldaryna 16 myńnan astam turǵyny bar 33 eldi mekendi sý basý qaýpi bar. Atap aıtqanda ol eldimekender Aqtóbe (3), Atyraý (1), Shyǵys Qazaqstan (7), Jambyl (2), Batys Qazaqstan (3), Qostanaı (3), Mańǵystaý (2), Pavlodar (1) jáne Túrkistan (11) oblystarynda», - dedi ol.