Sý tasqynyna qatysty qarjy bólý týraly ótinim túsken joq – Qarjy mınıstri

ASTANA. QazAqparat – Qarjy mınıstri sý tasqynynyń zardabyn joıýǵa qatysty qosymsha qarjy bólý máselesiniń qaralyp jatpaǵanyn aıtty, dep habarlaıdy QazAqparat tilshisi.

«Ázirge bizdiń mınıstrlikke sý tasqyny jaǵdaıy boıynsha eshqandaı esep aıyrysý nemese qarjy bólý týraly ótinim joq. Túsip jatsa mindetti túrde qarastyramyz. Máseleni aldymen jergilikti bıýdjet esebinen sheshýge tyrysamyz. Sebebi óńirlerdiń óz rezervi bar. Eger jaǵdaı qıyndaı tússe qarajatty respýblıkalyq bıýdjetten qarastyramyz», - dedi vedomstvo basshysy Erulan Jamaýbaev Úkimet úıinde BAQ ókilderiniń saýalyna jaýap bere otyryp.

Mınıstrdiń aıtýynsha, apatty jaǵdaılarǵa arnalǵan respýblıkalyq bıýdjette rezerv bar.

Eske salsaq, Tótenshe jaǵdaılar mınıstrligi sý tasqynynan úıler qulasa, shyǵyn jergilikti bıýdjetten óteletini týraly habarlaǵan edi.

«Bizdiń mınıstrlik jáne jergilikti atqarýshy organdardyń kúshimen eldi mekenderde arnaıy evakýatsııalyq beketter (pýnkt) uıymdastyrylǵan. Tótenshe jaǵdaıda qaıda barý kerektigin jergilikti halyq biledi. Eger turǵyndardyń úıleri qulap nemese basqa da zardap kelse onda shyǵyn óteledi. Ol úshin jergilikti bıýdjette qarjy qarastyrylǵan. Eger jetpese qarjy respýblıkalyq bıýdjetten qaralady»,- dep túsindirgen edi Tótenshe jaǵdaılar birinshi vıtse-mınıstri Ibragım Kúlshimbaev OKQ-de ótken brıfıngide.