Sý tasqynyna qarsy komıssııa Qostanaı oblysyndaǵy qaýipti aımaqty tekserdi
QOSTANAI. QazAqparat - Qostanaılyq sý tasqynyna qarsy komıssııa músheleri qaýipti aımaqtardy aralap kórdi, dep habarlaıdy «QazAqparat» HAA tilshisi.
Komıssııa Taranov, Denısov, Jitiqara, Qamysty jáne Naýryzym aýdandaryndaǵy qar erip jatqan aımaqty tekserdi. Qostanaı oblystyq TJD baspasóz qyzmetiniń aqparaty boıynsha, avıatekserýdiń baǵyty mynadaı bolǵan: Qostanaı qalasy - Varvarınka aýyly - Sverdlovka kenti - Komarovka kenti - Chaıkovskıı kenti - Marınovka kenti - Jelqýar sý qoımasy - Volgogradskıı kenti - Pýshkıno aýyly - Býrevestnık aýyly - Dámdi aýyly - Qarameńdi aýyly -Qostanaı qalasy - Voskresenovka aýyly - Sýrıkovka aýyly - Qostanaı qalasy.
Komıssııa músheleri Aıat, Tobyl, Jelqýar, Joıylma, Bersýat, Muqyr-Aıat, Sıntashta, Qamysty-Aıat jáne Shortandy ózenderin baqylap shyqty.
«Taranov aýdanynyń ortalyǵyndaǵy Aıat ózenine Reseı Federatsııasy aýmaǵynan sý aqpaǵan,- dep atap ótti TJD baspasóz qyzmeti.
«Qar jamylǵysy birtutas, erigen qar sýy arnaǵa qaraı aqpaǵan. Aralap ushyp shyqqanda baıqaǵanymyz boıynsha, oblystaǵy ózenderde muz jamylǵysy jatyr. Qaratomar sý qoımasynan Qunaı kentine deıin ańǵarlar taza, eshqandaı muz joq. Prırechenka, Chaıkovskoe, Marınovka, Pýshkıno aýyldarynyń mańaıynda birtutas qar jamylǵysy jatyr, erigen qar sýy ańǵarlarǵa kelip aqpaı jatyr».
Dál osy jaǵdaı basqa da eldi mekenderde oryn alýda, jappaı qar men muzdyń erýi baıqalmaıdy. Sınoptıkteri taıaý kúnderi aýa temperatýrasy 20 gradýsqa deıin kóterilip, onyń sońy nóserge ulasady dep boljaýda. Bul óńirdegi jaǵdaıdy ózgertýi múmkin.
