Sý tasqynyna qarsy 10 myń adam men 1,8 myń tehnıka jumyldyryldy
Tótenshe jaǵdaı mınıstrliginiń tótenshe jaǵdaılardyń aldyn alý departamentiniń bastyǵy Rýstambek Ámrın osylaı málim etti.
«Aqmola, Batys Qazaqstan, Shyǵys Qazaqstan, Soltústik Qazaqstan, Qaraǵandy jáne Pavlodar oblystarynda erigen qar sýyn sorý, qorǵaý bógenderin nyǵaıtý jáne topyraq salynǵan qaptardy tóseý, ózenderdegi muzdy kesý jumystary belsendi júrgizilýde. Sý tasqyny jaǵdaıyn jedel baqylaý úshin «Qazaqstan Ǵarysh Sapary UK» AQ ǵarysh monıtorıng derekteri paıdalanylady. Ózen basseınderiniń tasqynǵa qaýipti ýchaskelerinde aerovızýaldy zertteý turaqty negizde júrgiziledi», - dedi ol ortalyq kommýnıkatsııalar qyzmetinde ótip jatqan brıfıngide.
Mınıstrlik ókiliniń aıtýynsha, tasqyn maýsymyna órt sóndirý-qutqarý bólimsheleriniń, ishki ister organdarynyń, azamattyq qorǵanys jáne Ulttyq ulan áskerı bólimderiniń jeke quramynan 10 myńnan astam adam men 1,8 myńnan astam tehnıka jumyldyrylǵan.
«Sý basý qaýpi az óńirlerden qosymsha rezervtik toptar jasaqtaldy. Olardyń jalpy sany 1047 adam, 121 tehnıka, 47 júzý quraly jáne 127 motopompa. Sondaı-aq Kókshetaý tehnıkalyq ınstıtýtynyń jıyntyq jasaǵy men «Qazavıaqutqarý» AQ tikushaqtary joǵary daıyndyqqa keltirildi. Zardap shekken halyqqa palataly lager ornatý úshin TJM jedel rezerviniń múlki men tehnıkasy daıyndaldy. Olardy jetkizý jáne ornatý úshin kúshter men quraldar esebi jasaldy», - dedi Rýstambek Ámrın.