Sý tasqynyna daıyndyq: Óskemende 5000 ydys-qap pen 400 tonna qum ázirlendi
ShQO Tótenshe jaǵdaılar departamenti baspasóz qyzmetiniń málimetine súıensek, Óskemende kóktemgi sý tasqynyna daıyndyq jasalýda.
«Búgingi kúni Ahmer aýylyndaǵy Omarov kóshesinde aryqty tereńdetý jáne tazartý jumystary júrgizildi. Shmelev Log kentinde, «Metallýrg-3» baqsha qaýymdastyǵynda jáne 28 turǵyn aýdanda da osyndaı jumystar óz máresine jetti. Jibek matalar kombınaty, Ablaketka, Prombaza, Sogra, Kýlenov, Jylandy, Zaşıta, Neftebaza, Prohladnyı shaǵyn aýdandarynda, Ahmer aýylynda, Shyǵys, Prýdhoz kentterinde aryqtardy, Jýkovskıı, Sheshek, Brajınskıı jylǵalarynyń arnalaryn tazartý qolǵa alyndy», - delingen aqparatta.
Qazirgi ýaqytta qala aýmaǵyndaǵy ózender men jylǵalardaǵy jaǵdaı turaqty. Sý tasqynyna qarsy kezeńge barlyǵy 75 arnaıy tehnıka, jeke quramnan 120 adam jáne 20 tasymaldanatyn motopompa ázirlendi. Jaqyn arada taǵy osyndaı 10 motopompa satyp alý josparlanýda.
«Budan bólek, 5000 ydys-qap, 400 tonna qum, 70 tonna janar-jaǵarmaı materıaldary daıyndaldy. Qutqarýshylar halyqty úı mańyndaǵy aýmaqtardy qardan ýaqtyly tazartýǵa, aryqtar men jylǵalardyń arnalaryna qoqys tastamaýǵa shaqyrýda», - delingen habarlamada.
