Sý tasqynyna daıyndyq: Buqtyrma ózenindegi bóget jóndeldi

ÓSKEMEN. QazAqparat – Shyǵys Qazaqstan oblysynda sý tasqyny kezeńine daıyndyq jumystary bastaldy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirde sý tasqynyna qarsy 2021-2023 jyldarǵa arnalǵan is-sharalar jol kartasy iske asyrylýda.

Sonyń aıasynda eldi mekenderdi sý basýdan qorǵaý úshin Altaı aýdany Turǵysyn aýylyndaǵy Buqtyrma ózenindegi bóget jóndeýden ótti.

Budan bólek, Pýtıntsevo aýylyndaǵy Berezovka ózeniniń arnasyn tazartý, túbin tereńdetý jumystary júrgizilgen.

«Bıylǵy sý tasqyny kezeńine daıyndyq boıynsha Berezovka ózenindegi bóget keńeıtildi. Sonymen qatar Zýbovsk kentindegi uzyndyǵy 1100 metrge jetetin Grıaznýshka ózeni muzdan tazartyldy. Jergilikti atqarýshy organdar aýdan boıynsha 11,943 myń tekshe metr qar shyǵarǵan», - delingen habarlamada.

Sý tasqyny qaýpi bar kezeńge 27 tonna ınertti materıal, 7800 dana ydys-qap daıyndaldy.

Qajet bolǵan jaǵdaıda halyqty ýaqytsha ornalastyrýǵa arnalǵan 16 pýnkt quryldy.

Onda tósek-oryn, ydys-aıaqtar men qajetti zattar ázirlergen.

«Qalalar, aýyldyq okrýgter men kentterdiń ákimdikteri men sharýa qojalyqtary 131 tehnıka jumyldyra alady. Búgingi tańda Altaı aýdanynda qar jamylǵysynyń bıiktigi 71 sm-ge jetedi. Al topyraq tońy 40 sm qurap otyr», - delingen aqparatta.