Sý tasqynyna daıyndyq: Avtojoldardyń 500-ge jýyq qaýipti ýchaskesi baqylaýǵa alyndy
ASTANA. QazAqparat - Avtomobıl joldarynyń sý basý qaýpi bar 500-ge jýyq ýchaskesi baqylaýǵa alyndy. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
Onyń aıtýynsha, búgingi kúni QR Investıtsııalar jáne damý mınıstrliginde, vedomstvolyq baǵynysty uıymdarda aǵymdaǵy jylǵy Sý tasqyny kezeńine arnalǵan is-sharalar josparlary bekitildi jáne Sý tasqynyna qarsy komıssııanyń jumysy uıymdastyryldy. Jalpy, respýblıkalyq mańyzy bar avtomobıl joldarynda 1 284 avtojol kópiri, 14 686 sý ótkizý qubyry bar.
«Qazirgi ýaqytta táýlik boıy jumys isteıtin dıspetcherlik qyzmet uıymdastyryldy jáne avtomobıl joldaryna kúzet qoıylyp, uzaqtyǵy 316 shaqyrymdyq 476 qaýipti ýchaske, 942 qubyr jáne 101 kópir baqylaýǵa alyndy. Bekitilgen josparǵa sáıkes, sý tasqyny kezeńinde jumystardy ýaqtyly uıymdastyrý úshin qum, qıyrshyq tas, tsement, sý ótkizý qubyrlary, ydys-qaptar, janar-jaǵarmaı syndy qurylys materıaldary men konstrýktsııalar, ózge de tehnıkalar daıyndaldy», - dedi Jeńis Qasymbek.
Mınıstrdiń atap ótýinshe, is-sharalardy oryndaý kezinde óńirlerdiń aýa raıy men klımattyq jaǵdaıy, sondaı-aq 2017 jylǵy kóktemdegi muz erý jáne sý tasqyny kezeńindegi oqıǵalar eskerildi. Este bolsa, ótken jyly sý tasqyny saldarynan Aqmola, Jambyl, Shyǵys Qazaqstan, Qaraǵandy Soltústik Qazaqstan, Qostanaı, Pavlodar jáne Ońtústik Qazaqstan oblystarynda avtomobıl joldary ýchaskeleriniń jáne kópirlerdiń qıraýy men zaqymdanýy oryn alǵan edi.
