Sý tasqynyna baılanysty úsh oblystaǵy joldar jabyldy
ASTANA. QazAqparat - Kóktemgi sý tasqynyna baılanysty Shyǵys Qazaqstan, Qaraǵandy jáne Ońtústik Qazaqstan oblystarynyń birqatar joldarynda kólik qozǵalysy shekteldi, dep habarlaıdy «Qazaqavtojol» RMK baspasóz qyzmeti.
Shyǵys Qazaqstan oblysynda «Semeı-Qaınar» jolynyń 8-166 shaqyrymy aralyǵynda (27 shaqyrymyn sý shaıyp ketken) barlyq kólik túrleriniń júrisi shektelgen. Osy aralyqty aınalyp ótý «Semeı-Qaraýyl» oblystyq joly arqyly júrgiziledi.
Qaraǵandy oblysynda qarǵyn sýdyń tasýyna baılanysty «Aqshataý-Aǵadyr» jolynyń 166 shaqyrymynda 750 metr jerdi sý alyp ketkendikten onyń 90-167 shaqyrymy aralyǵy barlyq kólik túrlerine jabyldy. Bul tusty aınalyp ótý «Qaraǵandy-Aqsý-Aıýly-Aǵadyr» baǵytymen júrgiziledi.
Sonymen qatar, «Qaraǵandy-Aıagóz-Buǵaz» jolynyń 141 shaqyrymyndaǵy tusyn sý basyp qaldy (eni -350 m, tereńdigi - 10-15 sm).
Sý shaıyp ketken joldar:
1. «Jáırem-Qarajal-Atasý» 120 km (jol shetiniń úsh jerin sý shaıyp ketken, uzyndyǵy - 220 m, eni -1-2 m);
2. «Jáırem-Qarajal-Atasý» 151 km+500 m (shetin shaıyp ketý, uzyndyǵy -132 m, eni - 1-2 m).
OQO-da sý tasqynyna baılanysty «Samara - Shymkent» jolynyń 2217-2235 km (2229 km) aralyǵynda barlyq kólik túrleriniń qozǵalysyna tyıym salyndy. Óıtkeni Arys ózenindegi kópirdiń tirekteri men jaǵasyn sý shaıyp ketti.
Atalǵan ýchaskelerde sý shaıyp ketý saldaryn joıý, bekitý jumystary júrgizilýde, eskertý belgileri jáne baǵandary ornatylǵan.
