Sý tasqynymen kúreske mıllıardtaǵan qarjy emes, durys baǵdarlama qajet - Úkimet basshysy
ASTANA. QazAqparat - Búgin Úkimet otyrysynda Premer-Mınıstr Baqytjan Saǵyntaev óńir ákimderin kóktemgi sý tasqyny qaýipine barynsha jaýapkershilikpen qaraýǵa shaqyrdy, dep habarlaıdy QazAqparat.
«Ákimderdiń birde-biri Іshki ister mınıstriniń baıandamasyna nazar aýdarmady. Ol óz baıandamasynda qandaı oblystarda ne jasalmaı jatqanyn aıtty. Al ákimder bolsa, bárin jaqsy jasap jatyrmyz deıdi. Jasap jatqandaryńyz jaqsy, qoldaımyz. Al kóptegen dúnıege áli kúnge deıin nege jasalmady? Sondyqtan Qalmuhanbet Qasymov (Іshki ister mınıstri) Asqar Mamınmen (Úkimet basshysynyń birinshi orynbasary) ıesiz gıdrotehnıkalyq qurylǵylardy únemi baqylaýda ustańyz. Ótken jylǵydaı kinálini izdep júrmeıik, qorytyndysynda málimetterdi durys bermeıtin «Qazgıdromet» kináli bolyp shyǵady. Dóreki aıtar bolsa, ózderińizdiń qapy qalǵandaryńyzǵa eshqaısyńyz nazar aýdarmadyńyzdar jáne jaýapkershilik te almadyńyzdar», - dedi Baqytjan Saǵyntaev óńir basshylaryna qarata.
Іshki ister mınıstr Qalmuhanbet Qasymovtyń dereginshe, Aqtóbe oblysynda gıdrotehnıkalyq qurylǵylar boıynsha eskertý jospary ázirlenbegen. Aqmola oblysynda aldyn alý sharalary respýblıkalyq menshiktegi 15 gıdrotehnıkalyq qurylǵylarda ǵana josparlanǵan. Al kommýnaldyq menshiktegi 68 nysanǵa qatysty esh jospar joq. Dál osyndaı jaǵdaı Soltústik Qazaqstan oblysynda da oryn alýda. Kommýnaldyq menshiktegi 17 gıdrotehnıkalyq qurylǵyny qorǵaý sharalary uıymdastyrylmaǵan.
«Qazirdiń ózinde Qaraǵandy oblysyndaǵy Samarqand pen Yntymaq sý qoımalarynda jınaqtalǵan sýdyń kólemi 2017 jylǵy kórsetkishten asyp túsedi. Qar kúrt erip, sý qarqyndy kele bastaǵan jaǵdaıda sýdy apatty jaǵdaıda aǵyzýǵa týra keledi. Al bul ózenniń tómengi saǵasynda ornalasqan 44 eldi mekendi sý astynda qaldyrý qaýpin týdyrady», - dedi ol.
Sý tasqynyna daıyndyq máselelerin qorytyndylaǵan Úkimet basshysy jyl saıyn onyń saldaryn joıýǵa mıllıardtaǵan qarjy jumsaǵannan góri durys baǵdarlama qabyldaý qajettigin basa aıtty.
«Ótken jyly rezervten 5,8 mlrd teńge bóldik. Aqmola oblysynyń ákimdigi bir shaǵyn aýdan salyp tastaýǵa 2,3 mlrd teńgeniń jetetindigin aıtyp otyr. Al bıyl Qyzylorda 2 mlrd teńgeden astam qarjy suraıdy. Árıne, Qudaı saqtasyn, birdeńe bolyp qalsa suraıtyndar tabylady. Menińshe, bul aqshany tıimsiz jumsaý», - dedi Baqytjan Saǵyntaev.
