Sý tasqyny: Úrjardaǵy qaýipti aımaqtar tikushaqpen baqylandy
ÚRJAR. QazAqparat - Shyǵys Qazaqstan oblysy Tótenshe jaǵdaılar departamentiniń jaýapty qyzmetkerlerinen quralǵan toppen birge aýdan ákiminiń orynbasary Dıdar Hamıtov MI-8 tikushaǵymen Úrjar aýdanyndaǵy sý tasqyny qaýpi bar aımaqtardy aralap shyqty, dep habarlaıdy QazAqparat tilshisi.
Qarabuta, Kóldeneń, Kókterek, Keldimurat, Emil, Shaǵantoǵaı, Qatynsý, Qusaq, Shoshqaly ózenderi boıyndaǵy Naýaly, Úrjar, Maqanshy, Keldimurat sekildi eldi mekenderge tekserý júrgizildi.
Sonyń ishinde Eginsý men Qaraqol sý qoımalary jáne 6 sý taratý toraby qaraldy. Bul nysandar qalypty jumys jasaýda.
«Aýdanǵa qarasty barlyq eldimekenderdi tikushaqpen aralap shyqtyq. Qaýipti jerler anyqtalǵan joq. Dese de, apattyń aıtyp kelmeıtinin eskersek, saqtyq sharalaryna meılinshe muqııat bolǵan artyq etpes. Tótenshe jaǵdaılardyń aldyn alý boıynsha aýdandyq bıýdjettiń rezervinen 20699,0 myń teńge qarastyryldy. Tótenshe jaǵdaıda 24 tonna dızel otyny, 9 tonna benzın, 400 lıtr dızel otyny bar. Búgingi kúni qar jamylǵysynyń bıiktigi jazyq jerde 13 sm, taýlarda 68 santımetrdi qurap otyr. Topyraqtyń qatyp qalýy 59 sm. Qazirgi kúni aýdanda tasqynnyń aldyn alý boıynsha jumystar qolǵa alyndy», - deıdi aýdan ákiminiń orynbasary Dıdar Hamıtov.
