Sý tasqyny: túrkistandyq qutqarýshylar turǵyndardy úılerinen arqalap alyp shyqqan

Sý tasqyny kezinde qutqarýshylardyń turǵyndardy qutqarý sáti túsirilgen vıdeo áleýmettik jelide jarııalandy. Biri ájeıdi úı tabaldyryǵynan kólikke deıin arqalap alyp barǵan.

Endi biri úı ishindegi balalar men ózge de turǵyndardyń aıaǵyn sýǵa tıgizbeı, kóterip júrgenin kórýge bolady. Al, ekinshi vıdeoda úıdiń janyna toqtaǵan úlken kólikke adamdardy tereze arqyly ótkizgeni kórsetiledi.

Jelide jarııalanǵan vıdeoǵa qatysty oqyrmandar rızashylyqtaryn bildirip, túrli pikirler jazyp jatyr. Olardyń arasynda «Alla razy bolsyn!», «Qazaǵymnyń jigitteri aman bolsyn!», «Jaraısyńdar jigitter!», «Bizdiń elimizdiń qorǵaýshylary aman bolsyn!» degen jazbalar bar.

Eske sala keteıik, óńirdegi Kentaý, Túrkistan qalalarynda jáne Báıdibek, Saýran, Ordabasy aýdandarynda jaýyn-shashynnan kósheler men aýlalardy sý basqan edi.

Tasqyn sý Saýran aýdanyndaǵy eldi mekenderge qaýip tóndirdi. Sý tasqynyna baılanysty Saýranda mektep oqýshylary onlaın oqýǵa kóshti jáne 7 balabaqsha jumysyn toqtatty.

Óńirde kóligimen tasqyn sý ortasynda qalyp qoıǵan turǵyndar qutqaryldy.

Turǵyndar úshin «jedel jeli» iske qosyldy.

Keshe Túrkistan oblysynyń sý basqan aýdandaryn áýeden barlap shyqqan Tótenshe jaǵdaılar mınıstrligi eshqandaı qaýip joq ekenin málimdedi.