Sý tasqyny: SQO-daǵy respýblıkalyq mańyzy bar jol qalpyna keltirildi
PETROPAVL. QazAqparat - Soltústik Qazaqstan oblysynyń Ǵ.Músirepov aýdanynda tasqyn sý buzǵan «Almaty - Ekaterınbýrg» respýblıkalyq mańyzy bar avtojoldaǵy kólik qatynasy qalpyna keltirildi, dep habarlaıdy QazAqparat tilshisi.
Aqan-Burlyq ózeni arqyly ótetin jańa kópirdiń qurylysyna baılanysty respýblıkalyq mańyzy bar M-36 «Almaty - Ekaterınbýrg» trassasynyń jumys isteýine múmkindik beretin ýaqytsha aınalma jol salynǵan bolatyn. Alaıda sáýir aıynyń basynda ýaqytsha jol tasqyn sýdan zardap shekti. Mamandardyń aıtýynsha, bul avtokólik qatynasyna aıtarlyqtaı áser etpegen, kólikterge aınalyp ótýge týra keldi. Alaıda ózen bólip jatqan aýyldyq okrýgterdiń turǵyndary biraz qıyndyqtar kórdi. Jergilikti atqarýshy organdar, azamattyq qorǵaý qyzmetteri jáne SQO TJ departamenti turǵyndardyń turmys-tirshiligin jaqsartý úshin dereý keshendi sharalar qabyldady.
SQO TJD jedel-qutqarý jasaǵynyń málimetinshe, qutqarýshylar Aqan-Burlyq ózeni arqyly ótkel uıymdastyrdy. Sáýirdiń 2-15-i aralyǵynda olar 1000-nan astam turǵyndy, onyń ishinde 180-nen astam balany bir jaǵadan ekinshi jaqqa ótkizdi.
«Biz orta eseppen kúnine tańerteńnen keshke deıin 30 reıs jasadyq. Ózenniń laılanǵan sýymen 50 metr qashyqtyqty eńserý ońaı emes. Sonymen qatar, muz benen qatty aǵys kedergi boldy. Biraq biz tapsyrmany oryndadyq, turǵyndardyń rızashylyǵyna bólendik»,- deıdi SQO TJD jedel-qutqarý jasaǵynyń bas qutqarýshysy Nurlan Muqashev.
Tasqyn sý buzǵan aınalma jol búginde tolyq qalpyna keltirildi.
