Sý tasqyny: SQO-da qutqarýshylar toby aýyldarǵa attandy
PETROPAVL. QazAqparat – Soltústik Qazaqstan oblysynda tótenshe jaǵdaılar departamentiniń mamandarynan quralǵan arnaıy toptar sý basý qaýpi bar eldi mekenderge attandy, dep habarlaıdy QazAqparat tilshisi.
SQO TJD baspasóz qyzmetiniń málimetinshe, órt sóndirýshiler men qutqarýshylardan quralǵan toptar sý tasqyny kezinde jergilikti atqarýshy organdarǵa kómek kórsetedi. Mamandar ótimdiligi joǵary arnaıy avtokólikpen, motopompalarmen jáne motorly qaıyqtarmen jaraqtalǵan.
Top sý tasqyny bolǵan jaǵdaıda adamdardy qutqaryp, evakýatsııalaıdy, shaǵyn ózenderde muzdy kesip, jarady. Sý tasqyny jaǵdaıyn baqylap, monıtorıng júrgizedi.
«Departamenttiń jıyntyq jasaǵynyń bólimsheleri Ǵ.Músirepov jáne oblystyń Aıyrtaý aýdandaryna jiberildi. Olar sý basý qaýpi bar eldi mekenderdi qorǵaýdy qamtamasyz etedi. Mamandar qoıylǵan mindetti oryndap, halyqqa osy tabıǵı qubylysty zardapsyz ótkizýge pármendi kómek kórsetetinine senimdimin», - deıdi SQO TJD bastyǵynyń orynbasary Murat Qanǵojınov.
Onyń aıtýynsha, toptardyń quramynda 40 adam bar. Olar 8 tehnıkamen, 6 motopompamen jáne 4 qaıyqpen, zamanaýı baılanys quraldarymen jabdyqtalǵan.
Qutqarýshylar Aıyrtaý aýdanynyń Gýsakovka jáne Konstantınovka aýyldarynda jáne Ǵ. Músirepov atyndaǵy aýdannyń Rýzaevka, Chıstopole eldi mekenderinde ýaqytsha ornalasty. Sol jerde jeke quram sý qoımalaryn tekserip, alda atqaratyn jumystaryn josparlaýǵa kirisip ketti.
Esterińizge salaıyq, SQO-da kóktemgi sý tasqynynda 79 eldimeken zardap shegýi múmkin.
