Sý tasqyny: ShQO-nyń Novopokrovka aýylynda jaǵdaı turaqtandy
ÓSKEMEN. QazAqparat – Shyǵys Qazaqstan oblysy Borodýlıha aýdanynda sý basý qaýpi seıildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Novopokrovka aýylynda sý deńgeıi tústi. Qazirgi ýaqytta turǵyn úıler aýlalarynan qarǵyn sý ketken.
«Osyǵan deıin jer úılerden 36 adam evakýatsııalanǵan bolatyn. Barlyq azamattar týǵan-týystarynyń baspanalaryna ornalastyryldy. Jalpy, osy jumystarǵa ShQO TJD-nyń 37 qutqarýshysy, 2 tehnıkasy, 1 júzý quraly jáne 4 motopompa, Semeı qalasy № 68303 áskerı bóliminiń 19 áskerı qyzmetshisi, 4 tehnıkasy, jergilikti atqarýshy organdardyń 30 qyzmetkeri men 15 tehnıkasy jumyldyryldy. Sondaı-aq qumy bar 400 dana qap tóselgen», - delingen habarlamada.
Qazirgi ýaqytta qutqarýshylar men jergilikti atqarýshy organ ókilderi aýyldaǵy jaǵdaıǵa monıtorıng júrgizýdi jalǵastyrýda.
Esterińizge sala ketsek, keshe sý basqan Novopokrovka aýylynan halyq evakýatsııalanǵan bolatyn.
