Sý tasqyny: Samarlyqtar úılerine qaıta bastady - ShQO
ÓSKEMEN. QazAqparat - Kókpekti aýdanynyń Samar aýylyna dambydan qaýip tónip, 200-den astam qaýipsiz jerge kóshirilgen bolatyn. Búgin bógettegi sýdyń deńgeıi túsip, turǵyndar úılerine qaıta bastady, dep habarlaıdy QazAqparat tilshisi.
31 naýryzda 6 saǵat boıy tynbaı jaýǵan jańbyr Samar aýylynyń ústindegi Laıly sý bógetiniń deńgeıin kótergen bolatyn. Nysan basyndaǵy kezekshi top jaǵdaıdy der kezinde baıqap, saqtyq úshin Samar aýylyndaǵy 90-nan astam úıdiń turǵyndary qaýipsiz jerge kóshirildi. Onyń 20-sy mektep-ınternatty ýaqytsha panalaýda. Búgin dambydaǵy sý deńgeıi 1,5 metrge túsip, qaýiptiń beti seıilgendeı boldy.
«Eshbir úıge sý kirgen joq, bos turǵan bir úıdiń aýlasyna ǵana jaıyldy. Qazir ol sorǵytyldy. Biz Samardyń joǵary jaǵynda turǵan Laıly dambysy jaryla ma dep qaýiptengenbiz. Sol úshin turǵyndardy aldyn ala kóshirdik. Laılydan joǵary Karpovka degen qar sýyn jınaıtyn toǵan bar. Taýdan aqqan qar sýy sol toǵanǵa syımaı Laılynyń sýyn kóbeıtken. Laılyǵa syımaǵan sý tómendegi Eshkibas bógetine quıylýy kerek bolatyn. Eki ortadaǵy kanal men Jubandyq ózeniniń arnasyna qatqan muz sýdy bógep jazyq dalaǵa jaıyldy. Saldarynan aýyl ishindegi joldar búlindi. Bir táýiri kún kúrt sýytyp, Laılynyń deńgeıi tústi. Turǵyndar keshke qaraı úıine qaıta bastady» - deıdi aýdandyq tótenshe jaǵdaılar jáne jedel daıyndyq bóliminiń basshysy Qýanysh Ankebaev.
Samar aýdanynyń jaǵdaıyn tikeleı baqylaý úshin aýdanǵa oblys ákiminiń orynbasary Serik Aqtanov bardy. Ol «Qazsýshar» mekemesine bógetter arasyndaǵy kanaldardy tazartyp, aryqtardyń jolyn ashýdy tapsyrǵan. «Qazsýshar» mekemesiniń basshysy Aleksandr Lýkın jergilikti kásipker Aleksandr Fedosovpen aryqtardy tazalaý úshin tehnıka jiberýge keliskenin málimdedi. Qazir aýdandaǵy barlyq sý bógetterinde táýliktik monıtorıng jumys istep tur.
