Sý tasqyny saldaryn anyqtap, baǵalaý úshin qazaqstandyq spýtnık qoldanylýda
ASTANA. QazAqparat - Respýblıkadaǵy sý tasqyny ahýalyn baǵalaý úshin qazaqstandyq spýtnıktermen jerdi qashyqtyqtan zondtaý derekteri qoldanylýda. Bul týraly búgin brıfıngte QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Barlyq jerde QR ІІM bólimsheleri men jergilikti qutqarýshy organdarynyń birlesken táýlik boıǵy kezekshiligi júrgizilýde. Sondaı-aq, respýblıkadaǵy sý tasqyny ahýalyn baǵalaý úshin qazaqstandyq spýtnıktermen jerdi qashyqtyqtan zondtaý derekteri qoldanylýda.
Sý tasqynyna ushyraǵan óńirlerde sý aıdaý, turǵyn úı men jol aýmaqtaryn ınertti materıaldarmen qorshaý boıynsha jumystary jalǵasýda», - dedi ol.
Sońǵy derekter boıynsha, 16 188 adamnyń 14 631-i úılerine oraldy. 22 788 metr ýaqytsha bógender turǵyzyldy, 95 847 qapqa qum salynyp úıildi, 439 881 tekshe metr sý soryldy.
Sý tasqyny kezeńiniń basynan bastap, avarııalyq-qutqarý jáne basqa da kezek kúttirmeıtin jumystarǵa barlyǵy 6 518 adam, 1 722 birlik tehnıka, 154 sý sorý qurylǵysy, 113 júzý quraly jumyldyryldy.
