Sý tasqyny ózen arnalarynyń tasýynan emes, kúnniń kúrt jylynýy saldarynan bolyp otyr - V. Bojko
ASTANA. 21 mamyr. QazAqparat - Sońǵy jyldary elimizde oryn alǵan sý tasqyndarynyń basym bóligi ózen arnalarynyń tasýynan emes, kúnniń kúrt jylynýynan bolatyn qar erýleri men nóserler saldarynan oryn alyp otyr.
Búgin QR Parlamenti Májilisinde ótken Úkimet saǵatynda Tótenshe jaǵdaılar mınıstri Vladımır Bojko osylaı málim etti.
«Máselen, sáýir aıynyń basynda Shyǵys Qazaqstan men Batys Qazaqstan oblystarynda sý tasqynynyń zor qaýpi týyndaǵan bolatyn. Mınıstrlik osy óńirge jedel áreket etý maqsatynda 340 qutqarýshy bólimshelerin, 70 tehnıkany, júzý quraldarynyń 44 birligin jiberdi. Olardyń kúshimen 4,5 shaqyrymnan astam qorǵaý bógetteri nyǵaıtyldy, 30 ózen men 9 sý qoımasy zertteldi. 1437 jarylys ótkizilip, 39 eldi mekenge halyqqa qaýip týraly habarlar uıymdastyryldy. Arnalarǵa qum salynǵan 6 myńnan astam qap qoıylyp, 2,5 shaqyrym sý jiberý aryqtary tazartyldy», - deıdi mınıstr.
Al aqpan aıyndaǵy Ońtústik Qazaqstan oblysynda sý basý aımaqtarynan 3305 adam kóshirildi. Atalǵan óńirde tótenshe jaǵdaılar saldaryn joıýǵa 5051 adam jáne 1687 tehnıka, 348 kishi mehanızatsııa quraldary jumyldyryldy.
«Jalpy oryn alǵan sý tasqyndary oqıǵalaryna oraı, eldiń jáne oblystardyń bıýdjetinen qalpyna keltirý jumystaryna 34 mlrd. teńge, oblys ákimdikterinen 3 mlrd. teńgeden, ulttyq kompanııalardan - 5,5 mlrd. teńgeden astam qarajat bólindi. Respýblıka boıynsha barlyǵy 1766 jańa úı men páter salyndy. 1674 úı jóndelip, osy maqsatqa 855 mln. teńge berildi», - deıdi V. Bojko.
