Sý tasqyny: QR TJM óńirler boıynsha jaǵdaıdy aıtty
NUR-SULTAN. QazAqparat - Elimizdegi sý tasqyny boıynsha jaǵdaı turaqty. Bul týraly QR Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat.
«Sý tasqynyna qarsy is-sharalardy júrgizý, kóktem mezgilindegi tótenshe jaǵdaılardy joıý úshin Aqmola jáne Qostanaı oblystaryna Pavlodar, Qyzylorda oblystarynan qosymsha kúshter men quraldar jiberildi. Jalpy Aqmola oblysyna Pavlodar oblysy TJD-nyń jeke quramynan 19 adam, 2 tehnıka, 8 sý sorý tehnıkasy men jabdyǵy jiberildi. Qostanaı oblysyna Qyzylorda oblysy TJD-nyń jeke quramynan 27 adam, 2 tehnıka, 2 júzý quraly, 8 sý sorý tehnıkasy men jabdyǵy jiberildi. Búgin tańerteń Pavlodar oblysy TJD kúshteri men quraldary Aqmola oblysynyń Qaraótkel aýylynda avarııalyq-qutqarý jumystaryn júrgizýge kiristi», - dedi T.Ýálı.
Resmı ókil atap ótkendeı, ótken táýlikte kóktemgi sý tasqynynyń qaýip-qaterin azaıtý maqsatynda Nur-Sultan qalasynyń, Aqmola, Aqtóbe, Shyǵys Qazaqstan, Pavlodar, Soltústik Qazaqstan oblystarynyń aýmaqtarynda jergilikti atqarýshy organdar men TJM bólimsheleriniń kúshteri 574359,6 tekshe metr erigen qar sýyn sorý jumystaryn júrgizdi.
Aqmola jáne Soltústik Qazaqstan oblystarynda 4309 metr sý ótkizý arnalary men aryqtar tazartyldy.
Aqmola, Qaraǵandy, Shyǵys Qazaqstan jáne Soltústik Qazaqstan oblystarynda ınertti materıal salynǵan 7 myńnan astam qap daıyndaldy jáne 4 myńnan astam qap tóseldi.
Aqmola, Aqtóbe, Pavlodar jáne Soltústik Qazaqstan oblystarynyń jergilikti atqarýshy organdary eldi mekennen 16443 tekshe metr qar shyǵardy.
Muz keptelisiniń aldyn alý maqsatynda Qaraǵandy oblysy Nura aýdanynyń Barshyn jáne Keńjaryq aýyldyq okrýgteriniń aýmaǵynda úsh ýchaskede muzdy uqsaqtaý jumystary júrgizildi.
Profılaktıkalyq jumystardy júrgizýge jergilikti atqarýshy organdardan, TJM, ІІM jáne ákimdikterden 1097 adam, 333 tehnıka, 74 motopompa men 15 júzý quraly jumyldyryldy.
«Ótken táýlikte qardyń erýi saldarynan turǵyn úılerdi sý basý faktileri tirkelgen joq. Aqmola, Soltústik Qazaqstan, Qaraǵandy jáne Qostanaı oblystaryndaǵy joldarda 12 ret sýdyń tasýy boldy», - dedi T.Ýálı.
9 sáýirde saǵat 20:00-de Shyǵys Qazaqstan oblysy Borodýlıha aýdany Novopokrovka aýylynda Beregovaıa jáne Gagarın kóshelerin erigen qardyń sýy basý qaýpi boldy. 2021 jylǵy 10 sáýir, saǵat 09.00-degi jaǵdaı boıynsha Borodýlıha aýdany Novopokrovka aýylynda sý deńgeıi tústi. Qazirgi ýaqytta sý ketip, qaýip seıildi. Buǵan deıin 9 sáýirde 36 adam evakýatsııalanyp, týystaryna ornalastyrylǵan bolatyn. Jumystarǵa barlyǵy ShQO TJD-nyń 37 qutqarýshysy jáne 2 birlik tehnıka, 1 júzý quraly jáne 4 motopompa, Semeı qalasy № 68303 áskerı bóliminiń 19 áskerı qyzmetshisi jáne 4 birlik tehnıka, jergilikti atqarýshy organdardyń 30 qyzmetkeri jáne 15 birlik tehnıka jumyldyryldy. 400 dana qap tóseldi. ShQO TJD qutqarýshylary men jergilikti atqarýshy organdar aýyldaǵy jaǵdaıǵa monıtorıngini jalǵastyrýda.
Aqmola oblysynyń Qoıandy aýylyndaǵy sý astynda qalǵan 3 úıde TJD bólimsheleri men jergilikti atqarýshy organdar erigen qardyń sýyn sorý jumystaryn júrgizýde. Sý astynda qalǵan úılerdiń 10 turǵyny, onyń ishinde 4 bala Nur-Sultan qalasy men Qoıandy aýylyndaǵy týystarynyń úılerine ornalastyryldy.
