Sý tasqyny kezinde zardap shekkenderge bıýdjetten tek 19 mıllıon teńge beriledi
AQTÓBE. QazAqparat - Baspanasy sýda qalyp, múlki búlingen aqtóbelikterge bıýdjetten tek 19 mıllıon teńge tólenedi. Sebebi, tabıǵat apatynan zardap shekkenderdiń kóbiniń qujaty joq, olar múliktiń ózderine tıesili ekenin dáleldeı almaǵan, dep habarlaıdy QazAqparat tilshisi.
Aqtóbe qalasyndaǵy sý tasqyny kezinde zardap shekkenderge kómek kórsetý sharalary áli jalǵasyp jatyr. Negizgi shyǵyn qaıyrymdy jandardyń kómegimen jabyldy. Ásirese, «Qolqanat Aqtóbe» qoryna 168 mıllıon teńge túsip, qazirgi ýaqytta baspanasy qırap qalǵan 89 otbasy jańa aýdanda turǵyn úı qurylysyn júrgizip jatyr. Sonymen qatar, demeýshiler áleýmettik az qamtylǵan otbasylarǵa, múgedek jandarǵa 30 páter alyp berdi.
«Otbasynda múgedek adam bar bolsa, demeýshilerdiń kómegimen olarǵa tegin úı berildi. Úı salýǵa múmkindigi bar adamdarǵa jer berildi. Negizinen 1 myńǵa jýyq úıge sý kirgen. Barlyǵy 110 úı qulady. Olardyń 89-yna jer berilip, 20-y baspanaly boldy. 9 otbasyǵa ýaqytsha páter berildi. Sonymen qatar, 587 otbasynyń shyǵyny jabyldy. Keı adamdar shyǵynnan bas tartyp, saıajaıdaǵy jerdiń statýsyn ózgertip, turǵyn úıge arnalǵan jer retinde aýystyryp aldy. Adamdardyń qolynda múliktiń ózderine tıesili ekenin dáleldeıtin qujat bolmady. Shyǵyndy resmı óndirý úshin baǵalaý aktisin alý kerek. Baǵalaý júrgizý úshin múlik qujaty bolýy shart. Qazirgi kúni tek 19 mıllıon teńgeniń shyǵyny anyqtalyp otyr. Biz bul qarjyny bıýdjetten tóleımiz»,- dedi qala ákimi Іlııas Ispanov.
Aıta keteıik, qazir Aqtóbedegi sý tasqynynan soń Qýraıly, Sazdy, Órleý, Qyzyljar aýyldarynda qurylys jumystary júrip jatyr. Qazirgi ýaqytta birqatar baý-baqsha ujymdaryndaǵy úılerdi kóshirý josparda bar.
