Sý tasqyny kezinde turǵyndardy tasymaldaý úshin 1 603 vagon ázirlendi
ASTANA. QazAqparat – Sý tasqyny kezinde turǵyndardy tasymaldaý úshin 1603 vagon ázirlendi. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.
«Poıyzdardyń úzdiksiz qozǵalysyn, joldar men jasandy qurylystardy ýaqtyly daıyndaýdy qamtamasyz etý úshin «QTJ» Ulttyq kompanııasy 2022 jylǵy 1 jeltoqsandaǵy №957-TsZ buıryǵyn bekitti. Onda sý tasqyny kezeńinde jol men jasandy qurylystardyń saqtalýyn jáne turaqty jumysyn qamtamasyz etýge baǵyttalǵan uıymdastyrý-tehnıkalyq is-sharalar kózdelgen. Aýmaqtyq uıymdarmen birlesip sý qoımalarynyń, agrotehnıkalyq bógetterdiń jaı-kúıin tekserý, sondaı-aq qıyn jaǵdaı týyndaǵan kezde Tótenshe jaǵdaılar boıynsha oblystyq bólimshelermen ózara is-qımyl jasaý boıynsha jumystar júrgizilýde», - dedi mınıstr.
Onyń atap ótýinshe, ótken jyldardaǵy tasqyn sýlardy ótkizý tájirıbesin taldaý arqyly barlyq óńir boıynsha 673 qaýipti orynnyń tizbesi anyqtaldy. Tasqyn sýlar ótý kezeńinde táýlik boıy kezekshilik jáne anyqtalǵan qaýipti oryndardy qaraý uıymdastyrylady.
«Kópirlerdiń, qubyrlardyń, sý aǵyzý qudyqtarynyń sańylaýlaryn qardan tazartý, taýly jáne sý burý aryqtaryn, sondaı-aq naýalar men kıývetterdi ashý boıynsha daıyndyq jumystary bastaldy. Tastar, rels paketterimen jáne kondıtsııalyq emes temirbeton shpaldary bar 45 tasqynǵa qarsy poıyz qurylýda. 1 713 lokomotıv, 61 myń adamdy qaýipsiz jerge shyǵarýǵa bolatyn 1 603 vagon daıyndaldy. Sondaı-aq arnaıy tehnıkasy bar 84 qalpyna keltirý jáne órt sóndirý poıyzdary turaqty daıyndyqta. Qazirgi ýaqytta jol qashyqtyǵy boıynsha 2,4 myń tekshe metr tastar men 8 myń kondıtsııalyq emes temirbeton shpaldary ázirlendi», - dedi Marat Qarabaev.
