Sý tasqyny kezinde Aqtóbede 77 úı qulap qaldy
AQTÓBE. QazAqparat - Aqtóbede ózender tasyp, barlyǵy 77 úı qulap qaldy. Sý tasqyny kezinde 20 adam aýrýhanaǵa tústi, dep habarlaıdy QazAqparat tilshisi.
Aqtóbe qalasyndaǵy Qarǵaly, Sazdy, Aqtóbe sý qoımalary lyq tolyp, Elek, Qarǵaly, Jińishke ózenderi arnasynan tasyǵan kezde 2 myńǵa jýyq adam dalada qalǵan bolatyn. Qala ishinde barlyǵy 9 mektepte ýaqytsha beket ashylyp, 800-ge jýyq adam bilim ordasyn panalady. Al búgin qalalyq ákimdiktiń áleýmettik komıssııasy olardyń bári páterlerge, týǵan-týystaryna jiberilgenin málimdedi.
«Úıi sý astynda qalǵandar jerde jatpasyn dep oblystyq densaýlyq saqtaý basqarmasy kereýettermen qamtamasyz etti. Eriktiler óte jaqsy jumys istedi. Osy ýaqyt aralyǵynda úsh bala ómirge keldi. Olardyń bireýi perzenthanadan shyqty. Al 10 bala «Aqbóbek» saýyqtyrý ortalyǵyna, 20 adam qaladaǵy emdeý oryndaryna jatqyzyldy. Keıbiriniń qan qysymy kóterilip, júregi aýyrdy. Juqpaly aýrýǵa shaldyqqandar da bar eken»,- dedi qalalyq máslıhat hatshysy Sulýpan Shyntasova. 
Sý tasqyny kezinde barlyǵy 785 adam, ıaǵnı, 177 otbasy mektepterge jatqyzyldy. Al 819 adam týǵan-týysy men dostaryn panalady.
«Qalada shyǵyndy esepteý úshin 7 mobıldi top jumys istep jatyr. Olardyń janynda táýelsiz baǵalaýshylar bar. Barlyǵy 77 úı qulady. Ony qaıta qalpyna keltirý múmkin emes. Úıdiń teń jartysy qulap turǵan jaǵdaılar da kezikti. Kóbi Qısyqkól men Mahambetovka aýylynda. Úıler saman kirpishten salynǵan. Shynyn aıtqanda, turmystyq tehnıkanyń bári sý ishinde qalǵan. Atqarýshy organ eń bolmaǵanda tońazytqysh, gaz plıtasy sekildi asa qajet tehnıkany satyp alyp berýdi josparlap otyr. Baspanasyz qalǵandardyń 30 paıyzy sol aýmaqtardy páter jaldap júrgender»,- dedi S.Shyntasova. 
Aıta keteıik, arnaıy qurylǵan «Qolǵanat Aqtóbe» qoryna bir apta ishinde 11 mıllıon teńgeden astam qarjy tústi. Buǵan deıin habarlaǵanymyzdaı, mektepterge ýaqytsha qonystanǵan 110 otbasynyń árqaısysyna 30 myń teńge berildi. Qazir qordyń qarjysy 3 mıllıon teńgege azaıyp qaldy.
