Sý tasqyny: Kentaý qalasy men Saýran aýdanynda tótenshe jaǵdaı jarııalanýy múmkin
TÚRKІSTAN. QazAqparat – Kentaý qalasy men Saýran aýdanynda jergilikti deńgeıdegi tótenshe jaǵdaı jarııalanýy múmkin. Bul týraly Túrkistan oblysy Tótenshe jaǵdaılar departamentiniń bastyǵy Nurǵalı Júnisov shtab otyrysynda málim etti, dep habarlaıdy QazAqparat tilshisi.
Óńirde tasqyn sýdan eń kóp zardap shekken Saýran aýdany men Kentaý qalasy. Sondyqtan Túrkistan oblysy boıynsha tótenshe jaǵdaılar departamentiniń bastyǵy Nurǵalı Júnisov shyǵyn kólemin anyqtaý úshin Kentaý men Saýran aýdanynda jergilikti deńgeıdegi tótenshe jaǵdaı jarııalaý týraly usynys kóterdi.
Máselen, Saýran aýdanynda sý kirgen úılerdiń sany 100-den asqan. Abaı eldi mekeninde 65, Úlgili eldi mekeninde 14, Babaıqorǵanda 42 úıdiń aýlasyn sý basqan. Sondaı-aq 100-den astam adam evakýatsııalandy. Onyń ishinde kámelet jasqa tolmaǵan 57 bala bar. Aýdanda 7 balabaqsha jumysyn toqtatyp, 11 mektep onlaın oqýǵa kóshti.
Al Kentaý qalasy Qarnaq aýylynda aǵyn sýy 5 kóshemen ótip, 15 úıdiń aýlasyna kirgen. Zardap shekkender joq. Sýdy aǵyzý, burý jumystaryna 20-ǵa jýyq tehnıka men 150 qyzmetker jumyldyryldy.
Tótenshe jaǵdaı mamandarynyń aıtýynsha, óńirge 7 saǵattyń ishinde jaýǵan jańbyrdyń kólemi 10 kúndik mólsherden asyp túsken. Sonymen qatar 2-4 aqpan kúnderi aralyǵynda taýly aımaqtarda jańbyr, qar jaýýy yqtımal. Sondyqtan árbir aýdan, qalada sý tasqynynyń aldyn alý jumystary júrip jatyr jáne sý basý qaýpi bar aımaqtar men sý nysandarynda 24 saǵattyq kezekshilik uıymdastyrylǵan.
Sondaı-aq Túrkistan oblysyndaǵy sý basý saldaryn joıýǵa jáne avarııalyq-qutqarý jumystaryn júrgizýge kómektesý úshin Shymkent qalasy Tótenshe jaǵdaılar departamentiniń, QR Qorǵanys mınıstrliginiń kúshteri men quraldary kómekke kelip jatyr.
Aıta keteıik, Túrkistan oblysynda jaýǵan nóser men qardyń erýi saldarynan búgin tańerteń birneshe eldi mekendi sý basyp qaldy.
Foto: Túrkistan oblysy ákimdiginiń baspasóz qyzmeti
