Sý tasqyny qaýpine baılanysty ІІM bólimsheleri táýliktik rejımde apattyq-qutqarý jumysyna daıyn tur - V. Bojko
ASTANA. QazAqparat - Sý tasqyny qaýpiniń týyndaýyna baılanysty Іshki ister mınıstrliginiń barlyq bólimsheleri táýliktik rejımde apattyq-qutqarý jumystaryn engizýge daıyn tur. Bul týraly búgin Astanada ótken baspasóz máslıhaty barysynda Іshki ister mınıstriniń orynbasary Vladımır Bojko málim etti.
«Atap aıtqanda, Іshki ister mınıstrliginiń qosymsha kúshteri men quraldary Qaraǵandy oblysyna ornalastyryldy. Budan bólek, Aqmola oblysynda apattyq qutqarý toptarynyń jumysy kúsheıtilgen rejımde jumys isteıdi. Tutastaı alǵanda, barlyq qutqarý bólimsheleri apattyq-qutqarý jumystaryn engizý úshin táýliktik rejımde daıyndyqqa ótti», - dedi V.Bojko.
Onyń aıtýynsha, tótenshe jaǵdaılar týyndaǵan aımaqtarda 4 515 qutqarýshy, órt sóndirýshiler men Ulttyq gvardııa áskerıleri, 1 221 arnaıy jáne qutqarý tehnıkalary, 74 júzý quraldary apattyq-qutqarý jumystaryna jumyldyrylǵan. Sý soratyn 106 qurylǵy ornatyldy.
«Ózender men bógetterdegi sý deńgeıine táýliktik monıtorıng júrgizilip jatyr, qalyptasqan jaǵdaılar týraly jergilikti jurtshylyq ýaqytyly aqparattandyrylýda», - deıdi mınıstr orynbasary.
Eske salaıyq, brıfıng barysynda belgili bolǵanyndaı, sý tasqynynyń qaýpi týyndaǵan aımaqtardan 11 myń 172 adam kóshirilgen. 25 adam qutqarylsa, Aqmola, Qaraǵandy, Qostanaı, Shyǵys Qazaqstan, Pavlodar, Soltústik Qazaqstan oblystarynyń 17 aýdanynda 50 eldi mekendi sý basqan.
Budan bólek, on shaqty eldi mekende tótenshe jaǵdaılar qateri týyndap otyr.
