Sý tasqyny qaýpin azaıtý is-sharalary oryndalmaı otyr – Úkimet basshysy
ASTANA. QazAqparat – Óńirlerde sý tasqynyna daıyndyq tolyǵymen qamtamasyz etilmegen. Bul týraly búgin Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.
«Búginde óńirlerde sý tasqynyna daıyndyq tolyǵymen qamtamasyz etilmegen. Ótken jyly bul máseleni san márte aıttyq. Tek Úkimet otyrysynda úsh ret – kóktemde, jazda, kúzde qarastyrdyq. Aldaǵy kóktemde sý tasqyny táýekelderin tómendetý úshin atalǵan jol kartasyndaǵy is-sharalardy tolyq kólemde oryndaý qajettigin bárine eskerttik. Uzaq ýaqyttan beri jekelegen júıeli is-sharalar qabyldanbaı keledi. El turǵyndarynan sý tasqynynan qorǵaý is-sharalarynyń oryndalmaǵany týraly shaǵymdar únemi túsip jatyr. Sonyń saldarynan olardyń úıleri, múlikteri men maldary zardap shegýde. Máselen, Aqmola oblysynyń Qoshqarbaev aýylynda Nura ózeniniń jaǵalaýyn nyǵaıtý jumystary qarjylanbaǵan. Al ol jaqta tasqyn jylda jaǵalaýdy buzyp, sý úılerge jetedi. Almaty, Abaı, Atyraý, Batys Qazaqstan oblystarynda sý aǵyzý júıeleri nóser jaýyn men tasqynǵa tótep bere almaı otyr», - dedi Álıhan Smaıylov.
Osyǵan oraı Premer-Mınıstr barlyq óńirdiń ákimine qardy der ýaqytynda shyǵarýdy, onyń ishinde aýyldyq eldi mekenderde de qamtamasyz etý qajettigin eskertti. Aryqtardy, kárizderdi tazartyp, ýaqytsha bógetter salýdy tapsyrdy.
«Sonymen qatar ótken jyly aıaqtalmaǵan jáne osy jylǵa josparlanǵan sý tasqynyna qarsy is-sharalardy júzege asyrý úshin qarjy bólý qajet. Óńir ákimderi jol kartasy is-sharalarynyń sapaly júzege asyrylýyn qamtamasyz etýge, ótken jyldardaǵy jol kartasyndaǵy problemalyq máselelerdi sheshýge mindetti. Ákimder sý tasqyny máselesin jeke qatań baqylaýda ustasyn», - dedi Úkimet basshysy.
Foto: primeminister.kz
