Sý tasqyny qaýpi: Saǵyntaev oblys ákimderine naqty tapsyrmalar júktedi
ASTANA. QazAqparat - Búgin Úkimet otyrysynda Premer-Mınıstr Baqytjan Saǵyntaev sý tasqyny qaýpine baılanys ákimderge birqatar naqty tapsyrma júktedi, dep habarlaıdy QazAqparat tilshisi.
«Qazgıdromettiń boljamy boıynsha keıbir ózenderde ylǵal qory normadan asyp tur. Qar áli de jaýyp jatyr. Onyń ústine qazir boljamdardan kórip otyrmyz, aqpannyń úshinshi onkúndiginde aýa temperatýrasy kóteriledi dep kútilýde. Osyǵan daıyn bolýmyz qajet. Sol sebepti ákimderge birqatar tapsyrma bar. «Birinshi -tasqyn qaýpiniń aldyn alý jáne joıý boıynsha jol kartasyn sapaly qamtamasyz etý. Jumysty úılestirý Іshki ister mınıstrligine júkteledi», - dep atap ótti Úkimet basshysy.
Ekinshiden, B.Saǵyntaev ákimderge ıesiz gıdroqurylǵylardy kommýnaldyq menshikke berý jumystaryn aıaqtaýdy tapsyrdy.
«Úshinshi - sý qorǵaý aımaqtary men beldeýlerinde turatyn adamdar men nysandardy qaýipsiz jerge kóshirý. Tórtinshi Іshki ister mınıstrligi ákimdermen birlesip, sý tasqyny maýsymyna kúshter men quraldardyń tolyq daıyndyǵyn, qaýip tóngen jaǵdaıda halyqty ýaqytyly habardar etýdi qamtamasyz etetin bolsyn. Tótenshe jaǵdaı bolǵanda shuǵyl shara qoldaný qajet. Bul máselelerdiń barlyǵy Asqar Uzaqbaıuly Sizdiń baqylaýyńyzdy», - dedi Baqytjan Saǵyntaev birinshi orynbasary Mamınge qarata.
