Sý tasqyny qaýpi: BQO ákimi turǵyndardan óz aýlalaryn tazartýdy surady
ORAL. QazAqparat - Batys Qazaqstan oblysynda qala men aýyldyq eldi mekenderde qar tazalaý jumystary júrgizilýde, dep habarlaıdy QazAqparat tilshisi.
Búgin oblys ákimi Altaı Kólginov óńirdegi qar kóp túsken aýmaqtyń biri - Tasqala aýdanynda bolyp, kóktemgi sý tasqynyna baılanysty atqarylyp jatqan jumys barysymen tanysty.
Óńir basshysynyń aıtýynsha, bıyl oblysta sý tasqynynan keler qaýip bar. Óıtkeni toń ótken jylǵydan eki ese qalyń. Ótken jyly tońnyń qalyńdyǵy 50-60 santımetr bolsa, bıyl keı jerlerde 130 santımetrge deıin jetedi. Sondyqtan qaýiptiń aldyn alý úshin barlyq kúsh jumyldyrylýda. Ásirese, qary kóp Tasqala, Terekti, Zelenov, Aqjaıyq aýdandary men Oral qalasynda buǵan erekshe mán berilýde. Ózenderde oblystyq Tótenshe jaǵdaılar departamenti qyzmetkerleriniń kúshimen arnaıy apparatpen muzdy kesý jumystary júrgizilýde. Bul jumys Oralda aıaqtaldy, endi aýdandarda jalǵasýda.
«Bıyl qar aqpannyń sońy men naýryz aıynyń alǵashqy kúnderinde kóp jaýdy. Normadan artyq bolyp otyr. Sol sebepti ár qala, eldi mekende qar shyǵarý jumystary júrgizilýde. Mekemeler óz aldyna, turǵyndar óz aýlasyn tazalasa, durys bolar edi. Sonymen qatar sý júretin arnalar tazartylýda. Qalada kommýnaldyq mekemeler, aýyldarda sharýa qojalyqtary óz tehnıkalaryn bólýde. Bul jumysty Naýryz merekesine deıin tııanaqtap tastasaq deımiz. Sebebi alda taǵy da qar jaýady, kún jaýyn-shashyndy bolady degen boljam bar», - dedi Altaı Kólginov.
Aıta keteıik, búgin BQO jastarynyń bastamasymen óńirde «Járdem» kópshilik qar tazalaý sharasy bastaldy. Shara maqsaty - jastar arasynan eriktilerdi tartý arqyly jeke aýlalardan qar shyǵarýda jalǵyz basty qarııalarǵa, halyqtyń áleýmettik osal toptaryna kómektesý jáne qala kóshelerindegi sý aǵatyn basty aryqtardy qardan tazalaý jumystaryn júrgizý. Buǵan jastarmen qatar jeke kásipkerler, ár sala qyzmetkerleri jáne turǵyndar óz úlesterin qosýda. 
Sondaı-aq oblystyq Tótenshe jaǵdaılar departamentinen málim etkendeı, búginde ózendegi muzdy oıý jumystary keptelister bolýy múmkin 14 aımaqta júrgizilýde. Bular qala mańyndaǵy Derkól ózenindegi - 7, Shaǵan ózenindegi - 3, Chapaı aýyly Jaıyq ózenindegi 2 ýchaske. Sonymen qatar Derkól ózenindegi muzdy burǵylaý jumystary Tasqala aýdany ortalyǵynda jáne Zelenov aýdanynyń Zelenoe aýylynda júrgizilýde.
BQO TJD Jedel-qutqarý jasaǵynyń basshysy Asqar Kılıshevtiń aıtýynsha, sý tasqyny kezinde paıdalanylatyn barlyq tehnıka men jabdyqtar tekserilgen jáne jumysqa daıyn. «Oral qutqarýshylarynyń arsenalynda muzkeskish qurylǵy, motorly muz burǵylar, qolmen áreket etetin burǵylar, motopompylar, júzý quraldary, sýda qutqarý jabdyqtary, joǵary ótimdi tehnıkalar, zardap shekenderdi jylytý jáne olarǵa alǵashqy kómek kórsetý oryndaryn daıyndaýǵa arnalǵan shatyrlar, pnevmokarkasty modýlder, jylytqyshtar bar», - delingen taratylǵan habarlamada.
