Sý tasqyny qaýpi artta qaldy - TJK
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker sý tasqynyna qatysty jaǵdaıdyń turaqtalǵanyn málimdedi, dep habarlaıdy QazAqparat tilshisi.
«Qazaqstan boıynsha sý tasqynynyń qaýipti kezeńi artta qaldy. Búginde barlyq ózenderde sý deńgeıiniń tómendep jatqany baıqalady. Atap aıtqanda, Aqmola oblysyndaǵy Jabaı ózeninde sý deńgeıi 2 metr 30 santımetrdi qurap otyr. Bir táýliktiń ishinde sý 50 sanımetrge tómendedi. Atbasar qalasyna qaýip tónip turǵan joq. Astrahan aýdanyndaǵy Kolýton ózeniniń deńgeıi de tómendep keledi», - dedi V.Bekker elordada ótken baspasóz máslıhatynda.
Onyń aıtýynsha, Ertis ózenindegi muz keptelisi de Pavlodar oblysy arqyly ótip barady. Reseı Federatsııasynyń shekarasyna deıin 30 shaqyrymdaı qaldy.
«Shúlbi qoımasynan jiberiletin sýdyń kólemi sol qalpy sekýndyna 1 296 tekshe metrdi qurap otyr. Odan Ertistiń deńgeıi kóterilgen joq. Al Shyǵys Qazaqstan oblysynyń Besqaraı aýylynda úsh jeke úıdi sý basty. Negizi, ol úılerdiń turǵyndaryn múldem basqa jerge kóshirgen durys. Sebebi, atalǵan problema jyl saıyn qaıtalana beredi. Olar jer asty sýlary kóteriletin jerde turady. Sondyqtan, qazir sýdy sorsa da, basqa jerge aıdasa da, nátıje bolmaıdy. Báribir sýdyń ketkenin kútý kerek», - dep atap kórsetti V.Bekker.
Soltústik Qazaqstan oblysynda Esil ózeni arqyly Sergeev sý qoımasyna keletin sýdyń kólemi de azaıyp keledi. Kúni keshe qoımaǵa sekýndyna 778 tekshe metr sý kelse, bir táýliktiń ishinde atalǵan kórsetkish 328 tekshe metrge deıin tústi. Esil ózeni boıymen ornalasqan aýyldardy sý basqan joq.
«Degenmen, áli de bir aptadaı Aqmola, Shyǵys Qazaqstan, Pavlodar jáne Soltústik Qazaqstan oblystaryn baqylaýda ustaıtyn bolamyz», - deıdi V.Bekker.
Aıta keteıik, búgingi brıfıngte komıtet tóraǵasy Qosshydaǵy aýyz sý máselesin shuǵyl sheshý múmkin emes ekenin málimdedi. Budan bólek, sýdyń qorshaýynda qalǵan aýyldyń jaǵdaıy týraly aıtyp berdi.
