Sý tasqyny qaýpi áli de saqtalýda - Erlan Qoshanov

Ákimge «Kazvodhoz» RMK Qaraǵandy fılıalynyń dırektory Dúısembaı Ábjanov málimdegendeı, barlyq sý qoımalary men sýattardaǵy jaǵdaı baqylaýda.

- Qazir Samarqand sý qoımasynda biz sekýndyna 33 tekshe metr sý jiberip jatyrmyz. 21 naýryzǵa deıin bizdiń boljam boıynsha 170 mln tekshe metr sý bolýy tıis, - deıdi Dúısembaı Ábjanov. - Qazirgi ýaqytta bul kórsetkish 180 mln tekshe metrden sál asyp otyr. Bul kóp emes, 4 kúnde 9 mln jiberemiz dep josparlap otyrmyz. Sý kólemi kóterile bastaǵanda, úlken qaqpany ashamyz. Sý qoımasynda 4 qaqpa paıdalanylady, sý deńgeıi avtomatty túrde arnaıy qurylǵynyń kómegimen anyqtalady.
 

Samarqand sý qoımasynda jóndeý jumystary júrgizilip jatyr, olar aǵymdaǵy jyly da jalǵasady. Jóndeýge jumsalatyn jalpy soma - 200 mln teńgeden asady.

- Jalpy, qazirgi ýaqytta gıdrologııalyq boljam jaqsy. Ol 2018 jyldyń 1 naýryzyndaǵy ylǵal qoryn baqylaý jáne ólsheý málimetterine súıene otyryp qurylǵan. Maýsymdyq gıdrologııalyq boljam statıstıkalyq boljam ádisi negizine súıene otyryp qurylady, demek dálsizdikter bolýy múmkin, - dedi «Qazgıdromet» RMK Qaraǵandy oblysy boıynsha fılıalynyń dırektory Roman Andrııanov.
 

Ol qazirgi tańda túngi temperatýra nólden tómen túsip, kúndiz jylıtynyn atap ótti. «Ol degenimiz jaqsy, qar birtindep erıdi».

- Biz ylǵal qoryn normadan az bolady dep kútkenimizben, barlyq qalalar men aýdandar kóktemgi sý tasqynyna daıyndalýda. Barlyq jerlerde qar shyǵarylyp, sý ótkizý qubyrlary tazalanýda. Aǵadyrda oblysymyzdyń basqa aımaqtarynan erterek sý kelýi múmkin. Sondyqtan qazir biz qosymsha túrde sýdy buryp jiberý úshin taǵy bir transheıa qazyp jatyrmyz, sondaı-aq qorǵanys úıindisi jasaldy. Kóktemgi sý tasqynynyń zardapsyz ótýine tyrysatyn bolamyz, - dedi oblys ákiminiń orynbasary Anatolıı Shkarýpa.
 

Qaraǵandy oblysynyń TJ departamentiniń basshysy Ybrahım Kúlshimbaevtyń aıtýynsha, naýryzdyń 5-inen bastap TJ barlyq qyzmetteri joǵary daıyndyq rejimine kóshken, jedel shtab táýlik boıy jumys istep jatyr. Eldi mekenderde TJ bólimsheleriniń qyzmetkerleri aýdan ákimdiginiń ókilderimen birigip, reıdter ótkizýde.

- Sý tasqyny qaýpi áli de saqtalýda, sondyqtan barlyq qyzmetterge barynsha daıyn bolý kerek, - dep qorytyndylady Qaraǵandy oblysynyń ákimi. - Biz barlyq derlik jerlerde qorǵanys úıindilerin jasadyq, sý tasqyny qaýpi joǵary eldi mekenderde biz daıyndalyp otyrmyz. Alaıda kóktemgi sý tasqynyn boljaı almaımyz, sý biz oılamaǵan eldi mekenderde ketýi múmkin. Onyń barlyǵyn eskerý qajet. Barlyq ýchaskelik polıtseılerge ózen arnalary qalaı tazalanyp jáne qar shyǵarý jumystary qalaı atqarylyp jatqanyn tekserý tapsyryldy. Eger erteń bir jaıttar bolyp, eldi mekenderdi sý basyp jatsa, barlyǵyn jazalaımyz, tipti shyǵyndardy ózderine ótetýge deıin baramyz, - dedi Erlan Qoshanov.

Foto: karaganda-region.gov.kz