Sý tasqyny eldiń alty oblysynda kólik joldarynyń 140 ýchaskesi men 7 kópirdi buzyp ketken
ASTANA. QazAqparat - Sý tasqyny bastalǵaly eldiń alty oblysynda kólik joldarynyń 140 ýchaskesi men 7 kópiri shaıylyp ketken.
Bul týraly búgin QR ІІM TJK Tótenshe jaǵdaılardy joıý basqarmasynyń basshysy Alekseı Sovetov málim etti.
«Respýblıkamyzdyń alty oblysynda tasqyn saldarynan avtomobıl joldarynyń 140 ýchaskesi buzylǵan, sonyń 63 ýchaskesi qalpyna keltirildi. 7 kópir buzyldy. Jergilikti jerlerde joldardy nyǵaıtý, eskertý belgilerin ornatý, qosalqy jol qozǵalysyn uıymdastyrý, jol tósemin qalpyna keltirý jumystary júrgizilýde», - dedi ol búgin komıtette ótken brıfıngte.
Onyń aıtýynsha, jalpy ótken táýlikte 545 adam evakýatsııalandy, 111 bas úı janýary qaýipsiz jerge aıdaldy, 39 174 tekshe metr erigen qar sýy soryldy, 6030 metr ýaqytsha bógen salyndy.
Eske sala keteıik, sáýir aıynyń alǵashqy kúnderinde eldiń alty oblysynda kóktemgi qardyń kúrt erýine baılanysty ondaǵan aýyldy, júzdegen úıdi sý basqan bolatyn. Eń aýyr jaǵdaı Qaraǵandy oblysynda tirkeldi. Qazirdiń ózinde Mustafın atyndaǵy aýylda 267 úı sý astynda tur.
23 naýryzdan bastap barlyǵy 16 063 adam evakýatsııalandy, 43 034 bas úı janýary qaýipsiz jerge aıdaldy, 269 151 tekshe metr erigen qar sýy soryldy, 21 823 metr ýaqytsha bógetter salyndy, 3 211 metr bóget qalpyna keltirildi, 88 212 qap qum salynǵan qap tóseldi. Tasqynǵa qarsy is-sharalarǵa 6450 adam jumyldyrylyp, 1736 birlik tehnıka, 131 sý sorǵysh qurylǵy, 115 júzý quraly tartyldy.
Apattan kelgen shyǵyndy árbir oblysta jergilikti bıliktiń janynan qurylǵan komıssııalar anyqtap jatyr.
