Sý tasqyny boljamdary aı saıyn júrgiziledi - Qanat Bozymbaev
QR Parlamenti Májilisiniń jalpy otyrysynda Májilis depýtaty Quralaı Karaken QR Energetıka mınıstri Qanat Bozymbaevqa "Qazgıdromet" RMM qyzmet sapasy týraly saýal joldady.
"Sońǵy 5 jylda Qazgıdromet gıdrometeorologııalyq qyzmetiniń damýy men jańǵyrtylýyna qarjy bólinbedi. Búginde radıostantsııadaǵy meteobaqylaý qysqartylǵan baǵdarlama boıynsha júrgiziledi. Saldarynan daýyldyq eskertýlerdiń dáldigi 2015 jyly 90 paıyz bolsa, 2017 jyly 75 paıyzdy kórsetken, ıaǵnı 15 paıyzǵa azaıǵan. Al daýyldyq belgilerdi boljaýdyń mınımaldy ýaqyty 12 saǵattan 6 saǵatqa qysqarǵan".
Májilis depýtaty otandyq gıdrometeorologııalyq qyzmetti damytý men jańǵyrtý máselesi ózekti ekenin basa aıtty.
"Sáýir aıynda TJ komıtetiniń ókili sý tasqyny jaǵdaıynyń apatty saldaryna jaýyn-shashyn men qar mólsheri boıynsha durys derek bermegen Qazgıdrometti kinálady. Elimizdegi meteorologııalyq jaǵdaıdy eskersek, otandyq gıdrometeorologııalyq qyzmetti damytý men jańǵyrtý máselesi ózekti bolyp otyr. Osy oraıda Qazgıdrometti qarjylandyrý asa mańyzdy. Qazgıdrometti zamanaýı tehnologııalarmen jabdyqtaý boıynsha Úkimettiń qandaı jospary bar? Úsh jyldyq bıýdjette de buǵan qarjy qarastyrylmaǵan", - dedi Quralaı Karaken QR Parlamenti Májilisiniń jalpy otyrysynda.
Suraqqa jaýap bergen QR Energetıka mınıstri Qanat Bozymbaev Qazgıdromet qyzmetiniń barlyq memlekettik qyzmet úshin asa mańyzdy ekenin jetkizdi.
"Kelesi jyldan bastap, Qazgıdromet óz gıdrologııalyq boljamdaryn aıtarlyqtaı jaqsartady degen oıdamyz. Ol úshin gıdrologııalyq boljamnyń qazirgi ádistemesin jetildiremiz. Damyǵan elderde keńinen qoldanylatyn gıdrologııalyq boljamnyń sandyq modelin qoldanatyn bolamyz", - dedi mınıstr.
Sonymen birge, mınıstrlik 2018 jyldan bastap ІІM TJ komıtetimen birge qar kóp jınalatyn ormandar men jyralardy, ózen basseınderin aralap shyǵý jáne kóktemgi jaıylma sýdy baqylaý úshin jerdi qashyqtyqtan zondtaıtyn spýtnıkterdi qoldanýdy josparlap otyr.
Odan bólek, mınıstr sý tasqyndaryn úsh aı saıyn boljaıtyn sovettik ádisten arylý qajettigin aıtty. Budan bylaı, boljamdar ár aı saıyn júrgiziledi jáne sý tasqyny kezindegi boljamdar ár 10 kún saıyn naqtylanyp otyrady.
"Iá, shynynda da Qazgıdromet RMM quraldary eskirdi. Bıyl Qazgıdromet qyzmetin jetildirý boıynsha quny 17,5 mlrd teńgeni quraıtyn keshendi baǵdarlama jasap shyǵardyq. Onyń 11,5 mlrd teńgesin respýblıkalyq bıýdjet esebinen, qalǵan 5 mıllıardtan astam teńgeni kásiporynnyń óz qarajatynan tartqymyz keledi. Bes jylǵa arnalǵan bul baǵdarlama Qazgıdromet quraldaryn jańartýǵa jáne daýyldyq boljamdardyń aıtarlyqtaı naqtylana túsýine múmkindik beredi", - dedi Qanat Bozymbaev.
