Sý tasqyny bolýy múmkin óńirler ataldy
NUR-SULTAN. QazAqparat – «Qazgıdromet» RMK kóktemgi sý tasqyny kezeńine aldyn ala konsýltatıvtik gıdrologııalyq boljam jasady, dep habarlaıdy QazAqparat.
«Gıdrometeorologııalyq baqylaý derekterine sáıkes, 2020 jyldyń 31 qańtaryndaǵy jaǵdaı boıynsha SQO, ShQO, Qaraǵandy, Aqmola jáne Qostanaı oblystarynda qar jabynyndaǵy ylǵal qory ortasha normadan joǵary. Qar jınaý protsesi aqpan jáne naýryz aılarynda jalǵasatynyn aıta ketken jón», - dep habarlady «Qazgıdromet» RMK baspasóz qyzmeti.
Kóp jyldyq baqylaý derekteri boıynsha aqpan, naýryz, sáýir aılarynda jaýyn-shashynnyń aılyq normasy túsýi yqtımal jáne ol qaýipti gıdrometeorologııalyq qubylystardyń týyndaýyna ákelýi múmkin.
«Eger aqpan aıynda temperatýra kóterilip, kóp jaýyn-shashyn jaýsa, Qazaqstannyń ońtústik, ońtústik-shyǵys jáne shyǵys taýly ózenderinde erigen qar men jańbyrdan sý tasqyny bolýy múmkin. 2020 jyldyń aqpan aıyna arnalǵan sınoptıkalyq boljamǵa sáıkes, aýa temperatýrasy men jaýyn-shashyn mólsheri Qazaqstan aýmaǵynyń basym bóliginde klımattyq normadan joǵary bolady dep kútilýde», - delingen habarlamada.
Sınoptıkalyq boljamǵa sáıkes, aqpan aıynyń alǵashqy onkúndiginde kúndizgi jáne túngi aýa temperatýrasy kóteriledi, olar qardyń erýine, erigen qar sýynyń paıda bolýyna, muz keptelisteriniń paıda bolýyna jáne Qyzylorda, Shyǵys Qazaqstan, Almaty, Jambyl, Túrkistan oblystarynyń ózenderindegi sýdyń jaıylýyna ákep soǵýy múmkin.
Kóktemgi kezeńge negizgi gıdrologııalyq boljam 2020 jyldyń naýryzynda ázirlenedi jáne 2018-2019 jyldarǵa uqsas qysqa merzimdi jáne ortasha merzimdi gıdrologııalyq boljamdar apta saıyn (ár 3 kún saıyn naqtylaýmen) usynylatyn bolady.
