Sý tasqyny bolǵan Qobda aýdanyndaǵy 3 aýyl úsh kúnnen beri jaryqsyz otyr
Aqtóbe oblysyndaǵy sý tasqynyna qarsy jumys jalǵasyp jatyr. Jergilikti deńgeıde tótenshe jaǵdaı jarııalanǵan Qobda aýylynda qazirgi arnaıy komıssııa óz jumysyn bastady. Turǵyndardyń aryz-shaǵymdary qabyldanyp, qujattary jınalyp jatyr.
«Múlikti baǵalaý júrgizetin kompanııamen kelisimshart jasaldy. Erteńnen bastam árbir úıdiń shyǵyny esepteledi. Qazirgi kezde Baıtaq aýylyna qatynas shekteldi. Keshe olarǵa matorly qaıyqpen baryp, azyq-túlik aparyp berdik. Al elektr energııasy týraly aıtar bolsaq, aýylǵa elektr togy Qobda aýylyndaǵy qosalqy stantsııa arqyly tartylady. Negizgi tiregi sý ishinde qaldy. Búgin ózen qaıta bastady. Aldaǵy 2-3 kúnde sý qalypqa kelip, biz jaryqty qosamyz dep oılaımyz. Aýylda úılerdi sý basqan joq. Munda shamamen 220 úı bar», - dedi Qobda aýdanynyń ákimi Bolat Qulov.
Sonymen birge mamandar Qosótkel, Herson aýyldarynda jaryq joq ekenin habarlady. Sebebi baǵanalar sý astynda qalyp, keıbiri qulaǵan.
«Qazir biz naqty jaǵdaıdy baǵamdaı almaı otyrmyz. Qobdada 32 eldimeken bar. Onda 17 qosalqy shaǵyn stantsııa ornatylǵan. Úsh aýylda jaryq 13-naýryz kúni saǵat 22:00-den bastap sóndi. Negizgi stantsııaǵa da qaýip tónip, biz birneshe kún boıy jan-jaǵyn bekitý jumysyn júrgizdik»,- dedi sala mamany.
Sonymen birge Jaryq aýylynda qatynas shekteldi. Joldy sý shaıyp ketken.
«Matorly qaıyqpen arǵy betke óttik. Aýyl turǵyndarymen kezdestik. Jaryq bar, sý bar. Ózen jaǵadan shyǵyp, joldy jaılady. Kópir buzylmady. Jaryq aýylynda gırdotehnıkalyq qurylǵy ornatylǵan. Munda 3400 kóltaman, sýarmaly jer bar. Qajetti sý jınalyp jatyr», - dedi aýdan ákimi.
Oıyl aýdanynyń Oıyl ózeninde de sý kóterildi. Jolyn sý shaıǵan aýyl da bar.
«Oıyl-Qaratal aýdandyq mańyzy bar joldyń bir bóligin sý shaıyp, kólik qatynasy ýaqytsha shekteldi. Jalpy aýdanda úsh eldimeken qaýpi joǵary aýmaqqa kirdi. Biri – Ekpetal aýyly. Munda eshbir úıge sý kirmedi, biraq qaýip bolǵan soń 105 turǵyn evakýatsııalandy. Bári aýdan ortalyǵyndaǵy mektep-ınternatqa ornalastyryldy. Turǵyndardyń jatyn orny, tamaǵy bar. Mal da qaýipsiz aımaqqa shyǵaryldy. Ekinshisi – Qaratal aýyly. Munda 1 km bóget salyndy. Úshinshisi – Aqkemer aýyly. Ol jerden sý ótti», - dedi Oıyl aýdanynyń ákimi Asqar Qazybaev.
Aıta keteıik, jalpy oblys boıynsha 304 adam evakýatsııalandy. Sý tasqyny kezeńi bastalǵaly beri oblystyq shtab 2 myńnan astam ótinishti qabyldady.
