Sý tasqyny bolǵan eldimekenderde maldyń óleksesin jeıtin shıbóriler kóbeıgen
MAQTAARAL. QazAqparat – Maqtaaral aýdanyndaǵy topan sý basqan eldimekenderde balyq aýlaýǵa tyıym salyndy. Bul týraly Túrkistan oblystyq orman sharýashylyǵy jáne janýarlar dúnıesi aýmaqtyq ınspektsııasynyń balyq sharýashylyǵy bóliminiń basshysy Sháken Boranbaı málim etti, habarlaıdy QazAqparat tilshisi.
Sháken Boranbaıdyń aıtýynsha, balyqtyń jappaı qyrylýyn boldyrmaý jáne olardy qutqarý maqsatynda sarqyndy sýdy kanaldarǵa qýý jumystary júrgizilýde. Qazirdiń ózinde mamandar 8767 tekshe metr sýdy kanaldarǵa jiberip úlgergen. Búginde oblystyq orman sharýashylyǵy jáne janýarlar dúnıesi aýmaqtyq ınspektsııasynyń mamandary sý basqan aýyldarda táýlik boıy jumys isteýde. Basty maqsat – turǵyndardyń balyq aýlaýyna tyıym salyp, ýlaný faktileriniń aldyn alý bolyp otyr.
«Biz 12 mamyr kúni sý basqan eldimekenderdegi balyqtardyń jaramdylyǵyn anyqtaý maqsatynda 3 dana sazandy veterınarııalyq baqylaý jáne qadaǵalaý komıtetiniń Maqtaaral aýdandyq aýmaqtyq ınspektsııasy zerthanasyna joldadyq. Budan bólek, 3 dana sazan men 1 dana dóńmańdaı balyǵyn Shymkent qalalyq taýarlar men kórsetiletin qyzmetterdiń sapasyn qadaǵalaý basqarmasyna da jónelttik. Saraptama qorytyndysy aldaǵy aptada daıyn bolady. Soǵan deıin turǵyndardyń sarqyndy sýdan balyq aýlaýyna tyıym salynady», - deıdi Sháken Boranbaı.
Sonymen qatar apat bolǵan aımaqta úı janýarlarynyń óleksesi kóbeıýine baılanysty shıbórilerdiń sany kóbeıgen. Osyǵan oraı QR Aýyl sharýashylyǵy mınıstriniń 2017 jylǵy 5 jeltoqsandaǵy «Janýarlardyń sanyn retteý qaǵıdalaryn bekitý týraly» №480 buıryǵyna sáıkes tegis uńǵyly 12 kalıbrli ańshy qarýy ázirlenip, 45 myń teńgege 300 dana oq-dári satyp alynǵan. Qazirgi ýaqytta osy aýyldardaǵy shıbóriniń sanyn anyqtaý jumystary júrgizilýde. Oljalanǵan shıbóriler aýdandyq veterınarııa bólimshesine ótkiziletin bolady.
