Sý tasqyny: BQO-nyń taǵy bir aýdanynda tótenshe jaǵdaı jarııalandy
Aýdan ákimi Álııa Muhanbetjanovanyń málim etkenindeı, bul týraly búgin jedel shtab otyrysynda habarlandy.
Onyń sózine qaraǵanda, qazirgi kezde aýdanda kúrdeli jaǵdaı qalyptasyp otyr.
Sońǵy kúnderi qardyń kúrt erýi saldarynan aýdandyq mańyzy bar Shyńǵyrlaý-Aqshat-Segizsaı, Shyńǵyrlaý-Almaz, Shyńǵyrlaý-Ardaq-Aqtaý avtojoldaryn tórt jerden sý shaıdy.
Atap aıtqanda, Qýaǵash ózeni tasyp, Almaz aýylyna kireberis jerdegi úsh temir qubyrdan ótip úlgermegen sý joldan asyp ketti. Almaz aýylynda 4 áleýmettik nysan, 137 turǵyn úı bar, olarda 454 adam turady. Jalpy mal sany 3 myńǵa jýyqtaıdy.
«Atalǵan eldi mekenge aýdan ortalyǵy jáne aýyldarmen qatynas toqtatylyp, oqıǵa ornynda kezekshilik uıymdastyryldy. Jergilikti atqarýshy organ men mekeme qyzmetkerleri, tehnıkalar túgel jumyldyryldy», dedi aýdan basshysy.
Sonymen qatar Shyńǵyrlaý-Ardaq-Aqtaý avtojolynyń 60-shaqyrymynda sý shaıý oqıǵasy boldy. Aqtaý aýylynda 3 áleýmettik nysanǵa qosa, 103 turǵyn úı (426 adam) bar. Mal sany – 8731. Qazirgi tańda eldi mekenge sý tasqynynan keler qaýip joq. Jol qozǵalysy ýaqytsha toqtatyldy.
Sol sekildi Shyńǵyrlaý-Aqshat-Segizsaı avtojolynyń 106 jáne 108,6 km tusynda erigen qar sýy joldyń ekinshi betine shyǵyp ketti.
«Tótenshe jaǵdaılar týraly sheshimge sáıkes aýdan boıynsha tıisti is-sharalardy atqaratyn bolamyz», dedi QazAqparat tilshisine Álııa Muhanbetjanova.
Eske sala keteıik, budan buryn Batys Qazaqstan oblysyndaǵy Bórli aýdanynda tótenshe jaǵdaı jarııalanǵanyn jazǵan bolatynbyz.
Sondaı-aq Oral qalasynda tótenshe jaǵdaı jarııalandy.
