Sý tasqyny: BQO-nyń Qaratóbe aýdanynda tótenshe jaǵdaı jarııalandy

ORAL. QazAqparat - Batys Qazaqstan oblysynyń Qaratóbe aýdanynda kóktemgi sý tasqynyna baılanysty jergilikti aýqymdaǵy tabıǵı sıpattaǵy tótenshe jaǵdaı jarııalandy, dep habarlaıdy QazAqparat tilshisi.

Qaratóbe aýdany ákiminiń orynbasary Qaırat Tólepovtiń aıtýynsha, qazirgi kezde barlyq is-sharalar osy sheshimge sáıkes atqarylýda.

Onyń sózine qaraǵanda, kúni búgin Qorjyn aýylynda qaýip seıildi.

«Oblystyq tótenshe jaǵdaılar departamenti mamandary kelip, sondaı-aq jergilikti atqarýshy organdar kúshimen sýdyń astyndaǵy muzdy jaryp, aǵyspen aǵyzyp jiberý, basqa da jumystar qolǵa alyndy. Sonyń nátıjesinde sý ketti. Qazirgi kezde sý basqan úıler joq. Turǵyndar óz úılerinde turyp jatyr», dedi QazAqparat tilshisine Q.Tólepov.

BQO TJ departamentiniń baspasóz qyzmetinen málim etkenindeı, oblystyq mańyzy bar Jympıty-Qaratóbe jolynyń 102-shaqyrymynda joldy sý shaıyp ketti. Sonyń saldarynan Qaratóbe aýdanynda 9 eldi mekenmen qatynas úzildi. Qazirgi kezde oqıǵa ornynda joldy qalpyna keltirý jumystary júrgizilýde.

Eske sala keteıik, budan buryn Batys Qazaqstannyń Báıterek aýdanynda tótenshe jaǵdaı jarııalanǵanyn jazǵan bolatynbyz.

Sondaı-aq Aqsaı qalasynda úılerge sý kirip, 13 adam evakýatsııalandy.

Oralda sý basý qaýpine baılanysty Mashtakov aýylynan turǵyndar kóshirildi.