Sý tasqyny: BQO-da jaǵdaı kúrdelene tústi

ORAL. QazAqparat – Sý tasqynyna baılanysty Batys Qazaqstan oblysynda jaǵdaı kúrdelene tústi, dep habarlaıdy QazAqparat tilshisi.

BQO TJ departamentiniń jedel shtabynan málim etkenindeı, 11 naýryzdaǵy saǵat 00.00-degi málimetke sáıkes «Qazgıdromet» RMK-dan Derkól ózenindegi sý deńgeıi 487 santımetrge (qaýipti shegi – 520 sm) deıin kóterilgeni týraly habar tústi.

Sol sekildi Shejin-2 ózenindegi sý deńgeıi de 763-ke jetip, qaýipti deńgeıge (780 sm) jaqyndady.

Osyǵan baılanysty jergilikti atqarýshy organdar men TJ kúshterinen kezekshilik uıymdastyryldy. Departamentte oblys ákiminiń orynbasary Erjan Baltaevtyń basshylyǵymen shuǵyl otyrys ótkizilip, Tasqala (Tasqala kentine) men Báıterek (Zelenyı aýylyna) aýdandaryna TJD bólimsheleriniń jeke quramynan 27 adam, 5 tehnıka, 4 motopompa, 2 generator, 4 júzý quraly, 1 motobýr jiberildi.

Departamentten túsken málimetke qaraǵanda, jaǵdaıdy baqylaý úshin búgin saǵat 09.00-de Tasqala men Báıterek aýdandaryna Mı-8 tikushaǵymen ushý josparlanýda.

Derkól ózenindegi muzdyń qalyńdyǵy – 90 sm, topyraqtyń qatýy – 115 sm.

«Jedel shtabta turǵyndardan 494 qońyraý qabyldanyp, olar boıynsha sý basý qaýpin joıý maqsatynda ýaqtyly jumys atqaryldy. Sonymen qatar 9 mekemeniń jertólelerine 5 sm bıiktikke sý kirdi jáne ýaqtyly soryldy. Zardap shekkender joq. Tótenshe jaǵdaılardyń aldyn alý baǵytyndaǵy jumystar jalǵasýda», dep habarlady vedomstvodan.

Eske sala keteıik, budan buryn Batys Qazaqstanda 138 eldi meken erekshe baqylaýǵa alynǵanyn jazǵan bolatynbyz.

Sondaı-aq Oral qalasynda sý kestemen beriledi.