Sý tasqyny: Batys Qazaqstanda 138 eldi meken erekshe baqylaýǵa alyndy

ORAL. QazAqparat – Batys Qazaqstan oblysynda kóktemgi sý tasqynyna baılanysty 138 eldi meken, avto jáne temir joldardyń 128 ýchaskesi erekshe baqylaýǵa alyndy, dep habarlaıdy QazAqparat tilshisi.

BQO TJ departamentiniń bastyǵy Ernur Ótegenovtiń óńirlik kommýnıkatsııalar qyzmeti alańynda ótken brıfıngte málim etkendeı, atalǵan eldi mekenderge qardyń erýi men ózenderde sýdyń arnadan asýyna baılanysty qaýip tónýi yqtımal.

Mysaly, naýryz aıynyń aıaǵy men sáýirdiń basynda ózenderdiń tasýyna baılanysty 32 eldi mekende qaýip saqtalady.

Bul bastaýyn Reseıden alatyn Jaıyq, Derkól, Qaraózen, Saryózenderden sýdyń kelýine baılanysty.

Ótken jyly oblysta Jánibek aýdanynda Jaqsybaı, Qaratóbede Shalǵyn aýyldaryn sý basqany belgili.

Kúni búgin Jaqsybaıda qar joq bolǵanymen, Reseı jaqtan erigen sýdyń kelip qalýy múmkin. Sondyqtan bulardyń bári de baqylaýda.

«Qazirgi kezde oblysta kúrdeli gıdrometeorologııalyq jaǵdaı qalyptasyp otyr. Soǵan baılanysty Oral men Aqsaı qalalarynan, aýyldardan qar shyǵarý, sý sorý jumystary jalǵasyp jatyr. Avto jáne temir joldarda sý ótkizetin 614 turba tazartyldy. Oblys boıynsha barlyǵy 722 tehnıka, 88 júzý quraly, 265 motopompa, jeke quramnan 3368 adam tolyqtaı daıyndyqqa keltirildi. 18 225,5 tonna ınertti materıaldar, 109 304 dana qapshyq ázirlendi. Turǵyndardy evakýatsııalaý qajet bolǵan jaǵdaıda 61 875 adamǵa 280 pýnkt daıyn. Tótenshe jaǵdaı bolmas úshin turǵyndardyń ózderi de aldyn ala qamdanyp, aýlalaryndaǵy qardy shyǵarýy qajet», dedi E.Ótegenov.

Eske sala keteıik, budan buryn sý tasqynyna baılanysty Oralda jedel shtab qurylǵanyn jazǵan bolatynbyz.