Sý tasqyny: Batys Qazaqstan, Aqtóbe jáne Pavlodar oblystarynda jaǵdaı kúrdeli
«Aýa temperatýrasynyń kúrt jylynýy saldarynan elimizdiń barlyq óńirlerinde sý tasqyny jaǵdaıy qıyndady. Búgingi tańda Batys Qazaqstan, Aqtóbe jáne Pavlodar oblystarynda jaǵdaı kúrdeli. Elimizde qalyptasqan sý tasqyny jaǵdaıyna baılanysty TJM men óńirlerde jedel shtabtar jumys júrgizýde.
Batys Qazaqstan oblysyna erigen qar sýyn shyǵarý úshin Mańǵystaý oblysynan qosymsha kúshter men quraldar jiberildi. Olardyń jalpy sany 43 adam, 4 birlik tehnıka men 6 sý sorý quraly.
Batys Qazaqstan oblysy Qaratóbe aýdanynyń Shalǵyn kentinde jáne Bórili aýdanynyń Qyzyltal aýylynda 37 jeke turǵyn úı men 2 áleýmettik nysandy erigen qar sýy basty. TJM jáne jergilikti atqarýshy organdardyń kúshteri 87 adamdy qaýipsiz jerge evakýatsııalady. Búgingi kúni Batys Qazaqstan oblysynyń eldi mekenderinen 1 mln 156 myń m3 qar shyǵaryldy.Turǵyn úıler men aýla aımaqtardan 57 myń m3 erigen qar sýy soryldy.
Pavlodar oblysynda Rojdestvenka aýylyndaǵy 2 jeke turǵyn úı erigen qar sýy basty. Búgingi kúni turǵyn úıler men aýla aýmaqtarynan 56 500 m3 erigen qar sýy soryldy, eldi mekenderden 795 myń m3 qar shyǵaryldy», - delingen TJM baspasóz qyzmeti taratqan habarlamada.
Mınıstrliktiń málimetinshe Aqtóbe oblysynda 47 aýla aýmaqty erigen qar sýy basty. Eli mekenderden 345 myń m3 qar shyǵaryldy. Turǵyn úıler men aýla aýmaqtardan 5 808 m3 erigen qar sýy soryldy.
Sonymen qatar, Aqtóbe oblysynda 8 avtojol ýchaskesinde erigen qar sýy tasyp jatyr. Aqtóbe jáne Batys Qazaqstan oblystarynda 1 respýblıkalyq mańyzy bar avtojol ýchaskesi men 15 jergilikti mańyzy bar avtojoldardyń ýchaskesin sý shaıdy. Barlyq ýchaskelerde polıtsııa qyzmetkerleri men jergilikti atqarýshy organdardyń kezekshiligi uıymdastyryldy.
Osy jumystarǵa TJM, ІІM jáne jergilikti atqarýshy organdardan barlyǵy 621 adam, 289 birlik tehnıka jumyldyryldy.
