Sý tasqyny: Aıagózde qansha otbasy jańa baspana alady
ÓSKEMEN. QazAqparat - Aıagóz aýdanyndaǵy tasqynnyń shyǵynyn esepteý úshin qurylǵan komıssııa jumysynyń alǵashqy qorytyndylary jarııalandy, dep habarlaıdy QazAqparat tilshisi.
Tasqyn saldarynan Aıagóz aýdanynda 143 úıdi sý alǵan bolatyn. Baǵalaýshy komıssııa 18 úıdiń qulap, 52-si jaramsyz bolyp qalǵanyn rastady. Qalǵan 73 úıdi qalpyna keltirýge tolyq múmkindik bar. Onyń 22-sinde jóndeý bastalyp ta ketken. Bul derekterdi oblys ákimi Danıal Ahmetov BAQ ókilderimen ótken brıfıngte aıtty.
«Úıi búlingen 52 otbasynyń 16-sy buǵan deıin baspanaly bolǵan. Taǵy 18 úıdiń qujattary daıyndalyp jatyr. 3-4 kúnniń ishinde olar jańa baspanaǵa kiredi. Osylaısha 34 otbasy baspanamen qamtylmaq. Qalǵan 18 úı boıynsha kúmándi máseleler bar. Komıssııa músheleri olardy taǵy bir ret súzgiden ótkizedi » - deıdi ákim.
Bul aýdanda tasqynnan zardap shekenderdi baspanamen qamtý úshin 200 mln teńgeden astam qarajat bólinip otyr. Onyń 80 mln teńgesi oblys ákiminiń rezervinen, 42,3 mln teńgesi aýdan ákiminiń rezervinen alyndy. Qalǵan 100 mln teńgeni «Paryz» qory aýdarǵan. Tasqyn saldarynan úıin tastap shyqqan 515 adamnyń 408-i búginde úılerine kirgen.
