Sý tasqyny: Atyraý oblysynda jol jyrylyp, kólik qatynasy toqtady
Oblystyq polıtsııa departamentiniń baspasóz qyzmetinen málim etkendeı, «Inder-Qarabaý-Mııaly-Saǵyz» tas jolynyń 248-260 shaqyrymynda kólik qozǵalysy shekteldi. Joldyń bul bóligi Qyzylqoǵa aýdanynyń ortalyǵy Mııaly men oǵan kórshiles Jangeldın aýylyn jalǵaıdy.
Oblys ákimi baspasóz qyzmetiniń aqparatyna súıensek, bul – byltyr jyrylǵan joldyń bir bóligi. Topyraq tóselip, kólik ótetindeı etip jasalǵan. Búgin, 11 naýryzda tańǵy saǵat 4:45-te erigen qar sýynyń kóp kelýine baılanysty topyraq tóselgen jol qaıta buzylǵan.
«Josparǵa sáıkes jyrylǵan joldyń bóligine sý ótkizetin arnaıy qubyr qoıylady. Byltyr joldyń bul bóligine asfalt tóselgen joq. Jol tek topyraq tóselgen kúıinde tur», - dep málim etti oblys ákiminiń baspasóz qyzmetinen.
Qazir Mııaly aýylynan Jangeldın, Oıyl, Kózdiǵara, Tasshaǵyl, Jambyl, Qyzylqoǵa aýyldyq okrýgterine kólik qatynasy toqtaǵan.
Eske sala ketelik, budan buryn Atyraý oblysynda tórt aýyldan 17 myń tekshe metrge jýyq qyzyl sý sorylǵanyn habarlaǵan bolatynbyz. Qyzylqoǵa aýdanynyń ákimi Qanat Ázmuhanovtyń deregine qaraǵanda, 7 naýryzǵa qaraǵan túni nóser jańbyr jaýǵan.
Jańbyr men erigen qardyń saldarynan Mııaly aýyldyq okrýginde sý deńgeıi kóterilgen. Bul aýylishilik sý basý qaýpin týyndatqan.
«Tolassyz jaýǵan jańbyr Saǵyz aýylynyń ortasymen ótetin Noǵaıty ózeniniń arnasyn toltyryp jiberdi. Sol sebepten ózen jaǵalaýyn bekitýge 80-nen astam turǵyn jumyldy. Qazir Noǵaıty ózenindegi sý deńgeıi birtindep tómendep keledi. Al Saǵyz ózeninde aǵys báseńdedi», -degen edi Qanat Ázmuhanov.
Keıin Qyzylqoǵa aýdanynda áli de eki aýyldyń kóshelerin sý basyp jatqanyn jazǵan edik.