Sý tasqyny: Arnaıy shtab Saǵyz aýylyna keldi

ATYRAÝ. QazAqparat – Saǵyz aýylyna sý basý qaýpin tóndirgen Noǵaıty ózeni aqpannan beri úsh ret tasyǵan. Qazir ózen jaǵasyna bóget salynyp jatyr, dep habarlaıdy QazAqparat.

Budan buryn Atyraý oblysynyń Saǵyz aýylynan turǵyndar sý tasqyny qaýpine baılanysty evakýatsııalanǵan edi.

Oǵan sebep – aýyl ishimen aǵyp ótetin Noǵaıty ózeniniń tasýy. Tótenshe jaǵdaılar departamentiniń málimetinshe, 29 naýryzda saǵat 23:00 shamasynda aýyl turǵynynan atalǵan ózende sý tasý qaýpi týraly habar túsken. Saǵyz aýylyndaǵy №12 órt sóndirý bóliminiń qyzmetkerleri Noǵaıty ózeninde sý deńgeıi kóterilip, arnasynan asqanyn anyqtaǵan.

Al keshe, 30 naýryzda saǵat 22:00 shamasynda ózen tasyp, sý deńgeıi 3 metrge jetken. Ózen jaǵalaýyna taıaý ornalasqan úılerden 50 adam, onyń ishinde 23 bala jedel evakýatsııalandy. Búgin, 31 naýryzda saǵat 03:30 shamasynda evakýatsııalanǵan turǵyndar úılerine oraldy.

Osyǵan baılanysty Qyzylqoǵa aýdanynyń ákimi Nursultan Bısembıevtiń jetekshiligimen qurylǵan arnaıy shtab Saǵyz aýylyna keldi. Qazir shtab músheleri Noǵaıty ózeniniń jaǵalaýyna bóget salyp, bekitý jumysyn qadaǵalap júr.

«Ózen sýy 30 naýryzda kóterildi. Sóıtip, Saǵyz aýylyndaǵy 20-dan astam úıdi sý basý qaýpi týyndaǵan edi. Qaýipsizdik úshin sý basýy múmkin úılerdiń turǵyndary ýaqytsha №9 orta mektep pen kolledjge evakýatsııalandy. Jergilikti ákimdiktiń tıisti jumystardy jedel atqarýynyń nátıjesinde úılerdi sý basý qaýpi joıyldy. Eshqandaı úı men qora sýǵa ketken joq. Qaýipsizdik jumystaryna 20-ǵa jýyq tehnıka, ákimdik qyzmetkerleri, aýyl turǵyndary, ózge de mekemeler ókilderi men eriktilerden quralǵan 200-den astam adam jumyldy. Olar ózenniń osal tustaryn arnaıy qum salynǵan qaptarmen jáne topyraqpen bekitti», -dep habarlady ákimdiktiń baspasóz qyzmeti.

Saǵyz aýyly turǵyndarynyń aıtýynsha, Noǵaıty ózeni bıylǵy aqpannan beri úsh ret tasyǵan. Búgin Noǵaıty ózeniniń arnasyndaǵy sý deńgeıi tómendedi. Turǵyn úılerdi sý basý qaýpi seıildi.