Sý tasqyny: Almaty oblysynyń Qaınazar aýylynda jaǵdaı ýshyǵa tústi
TALDYQORǴAN. QazAqparat - Almaty oblysyndaǵy Qaınazar aýylynda qyzyl sý bútin bir aýylǵa jaıylyp jatyr. Bul oqys oqıǵa jaıly atalǵan eldi mekenniń turǵyndary qońyraý shaldy, dep habarlaıdy QazAqparat tilshisi.
«Saǵat 14:00 den beri jaǵdaı qıyndap ketti. Joǵary jaqtan aqqan sý aýylymyzǵa jaıylyp jatyr. Mamandar jumys isteýde, biraq úlgermeı jatyr. Qyzyl sý úılerge de kire bastady. Jańa ǵana bir otbasynyń úıine sý kirip, olar dalada qaldy. Jalpy aýylymyzda shamamen 5 myńnan astam turǵyn turady»,- deıdi qaınazarlyq Marat Baısov.
«Oqýshylar sabaqqa qatynaıtyn kishkentaı kópirdi alyp tastady. Qazir balalarymyz mektepke aınalma jol arqyly qatynaýda», - deıdi taǵy bir turǵyn Aqmarat Ibragımova.
Al Almaty oblystyq TJD baspasóz qyzmetiniń ókili Azamat Jurtbaev Jambyl aýdanyna qarasty Qaınazar aýylynda tıisti jumystar atqarylyp jatqanyn málim etti.
«Aryqtardy tereńdetý, tazalaý, aýlalardan sýdy shyǵarý jumystary júrip jatyr. Jergilikti organ jáne qutqarý qyzmetinen jalpy 15 adam osy jumystarǵa jumyldyrylǵan. Kelgen sýdyń kólemine saı bolmaǵandyqtan aýyldaǵy kishkentaı kópirdi alyp tastady. Shamamen 50 aýlaǵa sý jaıylǵan», - dedi A.Jurtbaev.
