Sý tasqyny: Aqtóbe oblysynyń aýylynda tótenshe jaǵdaı jarııalandy

AQTÓBE. QazAqparat - Aqtóbe oblysynyń Qobda aýylynda jergilikti deńgeıdegi tótenshe jaǵdaı jarııalandy, dep habarlaıdy QazAqparat ákimdikke silteme jasap.

Jergilikti deńgeıdegi TJ Qobda aýdanynyń ákimi Bolat Qulovtyń sheshimimen bekitildi.

Aıta ketsek, 13 naýryzda Qobda aýdanynda qardyń qarqyndy erýi jáne dalalyqta erigen qar sýy saldarynan Qobda aýylynda 15 úı, 28 aýla aýmaǵy, deneshynyqtyrý-saýyqtyrý kesheniniń ǵımaraty, bir kafe sý astynda qaldy.Turǵyndar qaýipsiz jerge - evakýatsııalyq pýnktke kóshirildi. Qazirgi ýaqytta úılerdiń aýlalaryn aralaý júrgizilýde, qapshyqtardy tóseý boıynsha sharalar qabyldanýda. 6 myń m3 astam erigen qar sýy soryldy. Sý tasqynyna qarsy is-sharalarǵa 35 tehnıka, 123 adam jumyldyryldy.

Sonymen qatar búgin Aqtóbe oblysynyń ákimi Eraly Toǵjanov Qobda aýdanyndaǵy turǵyndarmen kezdesip, komıssııa qurylǵanyn aıtty.

«Aýdanda komıssııa qurylyp, úıler tekseriletin bolady. Biz barlyǵyna qoldaý kórsetemiz, qarajat bólemiz, múmkindiginshe tez qalpyna keltiremiz. Bul jaǵdaıǵa muqııat taldaý júrgizilip, sý tasqynynyń qaıtalanýyna jol bermeý sharalary qabyldanady»,- dedi Eraly Toǵjanov.

Qobda aýdanyndaǵy jaǵdaı oblys ákiminiń jeke baqylaýyna alyndy.