Sý tasqyny: Adamdardyń ómirin saqtap qalý úshin ýaqtyly evakýatsııa jasaý kerek - Myrzalın
ASTANA. QazAqparat - Aqmola oblysynyń ákimi M.Myrzalın Atbasar aýdanynyń aýmaǵyn ushaqpen qarap shyqqan soń, Sandyqtaý aýdanyndaǵy sý tasqynynyń qaýpi bar aımaqty áýeden baqylap, Balkashıno aýylyna jedel jetti, dep habarlaıdy Aqmola oblysy ákimdiginiń ishki saıasat basqarmasy.
Jabaı ózeninde sý deńgeıiniń kóterilýine baılanysty Sandyqtaý aýdanynda 300 aýlalyq aýmaq sý astynda qaldy. Qazirgi tańda mamandar sý tasqynynyń keltirgen zalalyn esepteýde. Bul jerde táýlik boıy jergilikti atqarýshy organdar, ІІM jáne TJ jumys jasaýda. Sý tasqyny bolǵan aımaqtan 729 adam evakýatsııalandy.
Qazirgi tańda Sandyqtaý aýdanynda sý tasqynynyń saldaryn joıý úshin barlyq qajetti arnaıy quraldar jumyldyryldy. TJD jeke quramy men jergilikti polıtsııanyń 100 adamy qutqarý jumystaryna qatysýda.
Óńir basshysy Jabaı ózenindegi sý deńgeıin tekserip, sý astynda qalǵan úılerdi qarap shyqty jáne zardap shegýshilermen kezdesti. Malık Myrzalın aýdan ákimine barlyq kúshter men tasqyndy joıýǵa arnalǵan quraldardy tartyp, zardap shekken turǵyndarǵa kómektesip, bul jaǵdaıdy jiti baqylaýǵa alýyn tapsyrdy.
Balkashıno aýylyndaǵy sorǵy stansasynyń sý astyna qalýyna baılanysty aýyz sý berý toqtap qaldy. Qazirgi tańda «Kókshetaý Mınvody» JShS-dan aýyz sý tasymaldaý uıymdastyryldy.
Óńir basshysy Atbasar jáne Sandyqtaý aýdandaryna jasaǵan saparyn qorytyndylaı kele, eń birinshi kezekte adamdardyń ómirin saqtap qalý úshin ýaqtyly evakýatsııa jasap, barlyq arnaıy qyzmettiń ózara is-qımylyn uıymdastyryp, zardap shekken turǵyndarǵa jan-jaqty kómektesýdi, sondaı-aq sý basqan úıler, joldar, kópirler týraly naqty aqparat berýdi tapsyrdy.
