Sý tasqynynyń saldaryn joıý úshin 10 000-ǵa jýyq áskerı qyzmetshi jumyldyrylýy múmkin
ASTANA. KAZINFORM – Ulttyq ulan kúshteri men tehnıkalarynyń tabıǵı jáne tehnogendik sıpattaǵy tótenshe jaǵdaılardyń saldaryn joıý sharalaryna jumyldyrylady.
Jyl saıyn Qazaqstannyń keıbir óńirlerinde sý tasqyny kútiledi. Ótken jyldardaǵy tájirıbeni eskere otyryp, atqarýshy jáne kúshtik organdar aldyn ala daıyndalady. Olar qorǵanys bógetterin, jaǵalaý aımaǵyn nyǵaıtady jáne t. b. ІІM Ulttyq ulany ótken kóktemgi maýsymdarda óz áleýetin kórsetken bolatyn jáne bıyl da halyqqa kómektesýge daıyn.
Ulttyq ulan kúshteri men tehnıkalarynyń tabıǵı jáne tehnogendik sıpattaǵy tótenshe jaǵdaılardyń saldaryn joıý sharalaryna jumyldyrylady. Bul qoldanystaǵy zańnama, erejeler, nusqaýlyqtar, buıryqtar jáne azamattyq qorǵaý salasyndaǵy josparlar negizinde uıymdastyrylady.
— Áskerı rezervtegi jedel qutqarý jasaqtarynyń sany 1600 áskerı qyzmetshige deıin jetedi, olardyń qaramaǵynda 60-tan astam tehnıka bar. TJ aımaǵyndaǵy toptardy kúsheıtý úshin qosymsha 10 000-ǵa jýyq áskerı qyzmetshi jáne 350-den astam quqyqtyq tártip áskerleriniń tehnıkasy jumyldyrylýy múmkin. Qajettilik týyndasa, Ulttyq ulan avıatsııasy tótenshe jaǵdaılardy joıý maqsatynda Y8F200W ushaqtary men Mı-171E tikushaqtaryn bóledi. Tek ótken jyly apattyq aımaqta áýe tehnıkasy 46 ret ushaqpen, 115 ret tikushaqpen ushý jasady, — delingen Ulttyq ulany habarlamasynda.
Jalpy, 2024 jyldyń naýryz-maýsym aılarynda sý tasqynyna qarsy is-sharalarǵa qatysý úshin Ulttyq ulany 3,5 myńǵa jýyq áskerı qyzmetshini, 150-den astam avtomobıl jáne arnaıy tehnıkany bóldi. Nátıjesinde 5,5 myńnan astam adam evakýatsııalandy, onyń ishinde 501 adam avıatsııa arqyly qutqaryldy.
Aıta ketý kerek, ótken jyly ІІM Ulttyq ulanynyń jeke quramy shamamen 3 myń tonna gýmanıtarlyq kómekti tıeý-túsirý jumystaryn júrgizip, 15 myń metrden astam aryq tazartty. 2 mıllıonnan astam qapshyq daıyndap, tósedi. Sondaı-aq 130 myń metrge jýyq jaǵalaýdy bekitý jumystary úshin 5,5 myń tonnadan astam topyraq tasymaldandy.
Aıta ketelik Ulttyq ulan kýrsanttary SQO-da qum salynǵan 3 myń qap daıyndaǵan edi.