Sý tasqynynyń ekinshi tolqyny: ShQO-da Ertis ózeniniń boıyndaǵy aýyldardy sý basý qaýpi joq
SEMEI. KAZINFORM – Shyǵys Qazaqstan oblysynda Ertis ózeniniń boıyndaǵy aýyldardy sý basý qaýpi joq.
Qazir óńirde sý tasqynynyń ekinshi tolqyny júrýde. Soǵan oraı oblystaǵy taýly aýdandarǵa aerovızýaldy baqylaý jasaldy.
«ShQO ákiminiń orynbasary Baqytjan Baıahmetov pen TJD tótenshe jaǵdaılardyń aldyn alý basqarmasynyń bastyǵy Arman Naýryzbaevtyń tóraǵalyǵymen arnaıy jumys toby «Óskemen-Altaı-Katonqaraǵaı» baǵyty boıynsha ushyp ótti. Belgili bolǵandaı, qar negizinen taýlardyń soltústik betkeılerinde jatyr. Jazyq bóligi men ońtústik betkeıler taza», - dep habarlady oblystyq TJD baspasóz qyzmetinen.
Ertis ózeniniń boıyndaǵy jaǵalaý syzyǵyn tekserý kezinde eldi mekenderdi sý basý qaýpi baıqalmady. Jaǵalaýdy nyǵaıtý jáne ózenniń túbin tereńdetý, bógetterdi salý, ydys-qaptardy tóseý jumystary jalǵasýda.
«Komıssııa osy jumystardyń Altaı aýdanynyń Zýbovsk jáne Maleevsk kentterinde júrgizilýimen tanysty. Tekserilgen aýdandarda shuǵyl den qoıý jasaqtarynyń daıyndyǵy tekserildi», - delingen aqparatta.
Oblysta 23-26 sáýirde taýly aımaqtarda qardyń qarqyndy erýiniń jalǵasýyna baılanysty daýyldy eskertý jarııalandy. Osyǵan baılanysty kólbeý aǵyndardyń paıda bolýy, ózenderdegi sý deńgeıiniń kóterilip, shekti belgilerden asyp ketýi yqtımal.
Eske salsaq, buǵan deıin oblysta sý tasqynynyń ekinshi kezeńi bastalǵanyn habarlaǵan edik.
