Tasqynnan saqtaný: Ulttyq ulan kýrsanttary SQO-da qum salynǵan 3 myń qap daıyndady
ASTANA. KAZINFORM – Kóktemde qardyń erýimen birge Qazaqstannyń keıbir óńirlerinde sý tasqyny qaýpi artady.
Bıyl Soltústik Qazaqstan oblysynda kóktemgi sý tasqynynyń saldaryn barynsha azaıtý maqsatynda aldyn alý sharalary belsendi túrde júrgizilip jatyr.
Aımaqta jyl saıyn eldi mekenderdi sý basýdan qorǵaý, qorǵanys qurylystaryn nyǵaıtý jáne tabıǵı apattardyń aldyn alý boıynsha keshendi sharalar júzege asyrylady. Bul jumystardyń basty maqsaty – sý deńgeıiniń kúrt kóterilýinen bolatyn qaýip-qaterlerdi azaıtý jáne jergilikti turǵyndardyń qaýipsizdigin qamtamasyz etý.
Osy sharalar aıasynda Ulttyq ulan Akademııasynyń 60 kýrsanty Petropavl qalasyna jaqyn ornalasqan Teplıchnoe, Prıbrejnoe jáne Beskól aýyldaryna jiberildi. Olar qorǵanys bógetterin nyǵaıtý jumystaryna qatysyp, 3000-nan astam qum salynǵan qap daıyndap, sý basý qaýpi joǵary aımaqtarǵa ornalastyrdy.
Mundaı is-sharalar halyqqa kómek qolyn sozyp qana qoımaı, kýrsanttarǵa tótenshe jaǵdaılarda jumys isteý daǵdylaryn tájirıbe júzinde meńgerýge múmkindik beredi. Jumys júrip jatqan oryndarǵa qalalyq ákimdik ókilderi kelip, áskerı qyzmetshilerdiń eńbegin joǵary baǵalap, alǵys bildirdi.
– Tabıǵı apattardyń saldaryn boldyrmaýda bul jumystyń mańyzy zor. Sý tasqyny – eń qaýipti tabıǵı qubylystardyń biri, sondyqtan ýaqytyly qabyldanǵan sharalar úlken shyǵyndardyń aldyn alýǵa jáne zalaldy barynsha azaıtýǵa kómektesedi. Akademııa kýrsanttary tek áskerı mindetterdi oryndap qana qoımaı, beıbit halyqqa kómek kórsetýge de árdaıym daıyn. Qazirgi ýaqyttaǵy bolýy yqtımal tabıǵı apattyń aldyn alý jáne odan keletin zııandy boldyrmaý baǵytynda jumystar júrgizilip jatyr, – dedi 3-oqý batalony komandıriniń TjÁQJ orynbasary kapıtan Meırambek Talapker.
Ulttyq ulan «Báıterek» keshenin memlekettik kúzetpen qamtamasyz etýi múmkin ekenin jazǵan bolatynbyz.