Sý tasqynynyń aldyn alý: Qostanaıda muz jarý jumystary júrgizildi
QOSTANAI. KAZINFORM — Qostanaı oblysynda kóktemgi sý tasqynynyń aldyn alý maqsatynda ózenderde muzdy álsiretý jáne keptelisterdiń aldyn alý úshin jarylys jumystary júrgizilip jatyr. Bul týraly Qostanaı oblysynyń TJD habarlady.
— Qazirgi ýaqytta muzdy jarý jumystary Jangeldın, Naýryzym, Sarykól, Qarabalyq jáne Altynsarın aýdandarynyń aýmaǵyndaǵy ózenderde ótkizildi. Bul sharalar ózen arnalarynda muz keptelisteriniń paıda bolý qaýpin azaıtýǵa jáne sý tasqynynyń aldyn alýǵa baǵyttalǵan, — delingen habarlamada.
Júrgizilip jatqan jumystarǵa tótenshe jaǵdaılar qyzmetiniń mamandary men arnaıy uıymdardyń ókilderi tartylǵan. Barlyq jarylys jumystary qaýipsizdik talaptaryn saqtaı otyryp júzege asyrylyp jatyr.
Buǵan deıin Aqtóbedegi Elek ózeninde, Shyǵys Qazaqstandaǵy Úlbi ózeninde jáne BQO-da muz jarý jumystary júrgizilip jatqany týraly jazdyq.