Sý tasqynynyń aldyn alý: el óńirlerinde qandaı jumys istelip jatyr
ASTANA. KAZINFORM — Tótenshe jaǵdaılar vıtse-mınıstri Kegen Tursynbaev el óńirlerinde sý tasqynyna qarsy qandaı jumystar atqarylyp jatqanyn málimdedi.
— Múddeli memlekettik organdarmen birlesip, qaýipti ýchaskeler men gıdrotehnıkalyq qurylystar baqylaýǵa alyndy, sý tasqynyn boldyrmaý is-sharalarynyń iske asyrylýy tekserildi. Óńirlerde 590 shaqyrym qorǵanys bógetteri men bilikterine jóndeý jumystary júrgizilip nyǵaıtyldy, 164 shaqyrym drenaj júıesi jóndelip salyndy, 658 shaqyrym kanaldar men aryqtar turǵyzyldy. Ózen arnalaryndaǵy 360 shaqyrym jaǵalaý bekitilip, túbin tereńdetý jumystary júrgizildi, 190 shaqyrym ózen aýmaǵy tazartyldy, — dedi ol Úkimet otyrysynda.
Sondaı-aq vıtse-mınıstr 10 aqpannan bastap Komandalyq ortalyqtyń bazasynda Sý resýrstary, Іshki ister, Kólik, Tsıfrlandyrý mınıstirlilekteri jáne Qazgıdromet ókilderiniń qatysýymen sý tasqynyna qarsy jedel shtab iske qosylǵanyn jáne qazirgi kezde barlyq óńirde osyndaı shtabtar jumys istep jatqanyn atap ótti.
— Sý tasqyny kezeńi bastalǵannan beri elde shamamen 4,3 mln tekshe metr sý soryldy, alty júz myńnan astam qum salynǵan qap tóselip, segiz júz shaqyrymnan astam aryq tazartyldy. Aldyn ala 383 adam evakýatsııalandy. 51 myńnan astam mal qaýipsiz oryndarǵa aıdaldy, barlyǵy keri qaıtaryldy. Avtomobıl joldaryn sý shaıǵan 176 jaǵdaı men sý jyryp ótken 25 ýchaske tirkeldi. Qazirgi tańda baqylaýda turǵan 21 avtojol men sý jyryp ótken 5 ýchaske bar. Mınıstrlik sý tasqynyna qarsy is-sharalardy úılestirý men kún saıyn olarǵa monıtorıng júrgizý jumystaryn jalǵastyryp jatyr, — dep túıdi sózin Kegen Tursynbaev.
Aıta ketelik Premer-mınıstr Oljas Bektenov Aqmola oblysyndaǵy sý tasqyny kezinde eki aýdannyń ákimi jaǵdaıdy baqylaýdan shyǵaryp alǵanyn aıtqan edi.