Sý tasqynynan zardap shekkenderge der kezinde kómek kórsetilip jatyr – Májilis depýtattary
ASTANA. KAZINFORM – Májilis depýtattary sý tasqynynan zardap shekken óńirlerde jumysyn jalǵastyryp jatyr. Qazirgi ýaqytta eldimekenderge qajetti kómek kórsetilip jatyr. Sýdy burý, turǵyndardy evakýatsııalaý jumystary júrgizilip jatyr. Bul týraly Májilistiń Baspasóz qyzmeti habarlady.
Májilismen Nurjan Áshimbetov Pavlodar oblysynyń turǵyndarymen jáne jergilikti qurylymdardyń ókilderimen kezdesti. Depýtat Myńqul jáne Petropavlovka aýyldaryndaǵy jaǵdaımen tanysty. Munda qutqarýshylar, jergilikti bılik pen turǵyndar birlesip jumys istep jatyr. Aýdan, aýyl ákimdikteri sý tasqynynyń saldaryn joıý sondaı-aq buzylǵan ınfraqurylymdy qalpyna keltirý boıynsha qajetti sharalardy qabyldap jatyr.
Qostanaı oblysynda da sý tasqyny qaýpi áli de bar. Osy aptada óńirge Májilis depýtaty Oljas Quspekov baryp, sý basý qaýpi bar aımaqtar men shekaralas óńirlerdi aralady.
– Qostanaıda sý tasqynynyń saldaryn joıý jumystary júrip jatyr. Eriktiler, memlekettik organdar men partııa músheleri qala jaǵalaýlarynda sý tasqynyna qarsy is-sharalardy ázirlep jatyr. Jaǵalaýdy nyǵaıtý jumystary qarqyndy júrgizilip, myńnan astam qap ınertti materıal daıyndalyp, 700-ge jýyǵy tóseldi, - dedi depýtat.
Májilismen Qostanaı avtomobıl kóligi kolledjiniń jataqhanasynda da bolyp, sý tasqynynan zardap shekkenderdi ornalastyrýǵa daıyndyǵyn tekserdi. Depýtat sý tasqynynyń qaýipsiz ótýin qamtamasyz etýge keshendi sharalardy júzege asyrý úshin ózen arnalaryn tazartý, qorǵanys bógetterin nyǵaıtý, apatty gıdrotehnıkalyq qurylystardy jóndeý sharalaryn ýaqytyly qarjylandyrý qajettigin atap ótti.
Búgin sondaı-aq bir mandatty okrýg boıynsha saılanǵan depýtat Abzal Quspan Batys Qazaqstan oblysyndaǵy apattan zardap shekkenderge arnalǵan gýmanıtarlyq kómek qoımasynda boldy. Depýtat pen eriktilerdiń aıtýynsha, Oralǵa 10 tonnaǵa jýyq azyq-túlik pen qajetti zattar jetkizilgen. Oblys turǵyndary men kásipkerlerden jáne elimizdiń ózge óńirlerinen kómek jiberilip jatyr. Osynyń barlyǵy sý basqan aımaqtardaǵy halyqqa taratylady. Joldy sý shaıyp ketken eldimekenderge tikushaqpen jetkiziledi. Ákimdiktiń resmı chattary, eriktiler men qutqarýshylar arqyly turǵyndarmen baılanys jasalyp otyrady. Depýtat Abzal Quspan jaǵdaı turaqtalǵansha oblysta bolady.
Jem ózenindegi sý deńgeıiniń kóterilýine baılanysty Jylyoı aýdanynda da 2680 turǵyn úı men ákimshilik ǵımaratty sý basty. Qulsary qalasy boıynsha halyqty habardar etý úshin 5 ret dabyl sırenasy iske qosyldy.
Osy jaǵdaıǵa oraı Májilis depýtaty Dúısenbaı Turǵanov Atyraý oblysy Qulsary qalasyna bardy. Aldymen ol Qaraton aýylynda bóget turǵyzyp jatqan aýyl halqymen kezdesip, bógetterdi nyǵaıtý jumystaryna da qatysty.
– Apat aıasynda Úkimet jumysty kúsheıtip, sý tasqyny zardaptaryn joıý úshin tıisti sharalardy qabyldap jatyr. Premer-mınıstr basqaratyn respýblıkalyq shtab quryldy. Úkimet basshysy da, onyń orynbasarlary da, Tótenshe jaǵdaılar mınıstri de zardap shekken óńirlerdi aralap júr. Barlyq jergilikti qutqarý jumysy Memleket basshysynyń jeke baqylaýynda, – dedi Dúısenbaı Turǵanov.
Qulsary qalasynyń turǵyndaryn evakýatsııalaý áli jalǵasyp jatyr. 5 sáýirden bastap barlyǵy 15 632 adam evakýatsııalandy, onyń ishinde 5 055-i bala. Qulsary qalasynyń evakýatsııalanǵan turǵyndarynyń bir bóligi óz erikterimen týystaryna barý úshin Mańǵystaý oblysynyń eldimekenderine ketti.
Bógetterdi nyǵaıtý jumystary kúsheıtilip jatyr. Jalpy 1 sáýir men 6 sáýir aralyǵynda 45 902 qapshyq, 174 342 tonna ınertti materıal tóseldi.
Májilis depýtaty budan soń halyqtyń qaýipsizdigin qamtamasyz etý úshin Qulsary qalasynda ashylǵan shtab jumysymen tanysty, aýdan ákiminiń orynbasarymen kezdesti.
Qazirgi ýaqytta jalpy sany 559 qyzmetker, 148 birlik tehnıka, 2 júzý quraly jáne 500 erikti jumyldyryldy.
